આગ્રા :શહેરના એક રિટાયર્ડ જજના ઘરે રક્ષાબંધનના પર્વની ખુશી ડબલ થઈ ગઈ હતી. કારણ કે, નિવૃત્ત જજની પુત્રી અને પુત્ર એકસાથે ગઈકાલે જજ બન્યા છે. ભાઈ અને બહેને ઉત્તર પ્રદેશ ન્યાયિક સેવામાં પોતાની સફળતાનો ડંકો વગાડ્યો હતો. જેના કારણે પરિવાર અને પરિચિતો ઉજવણી કરી રહ્યા છે. ભાઈ અને બહેને ઘરે તૈયારી કરીને પ્રથમ જ પ્રયાસમાં આ સફળતા મેળવી છે. આ અંગે ભાઈ-બહેનનું કહેવું છે કે, સફળતા મેળવવાનું કોઈ શોર્ટકટ નથી હોતું. સખત મહેનત અને સમર્પણથી દરેક લક્ષ્ય પ્રાપ્ત કરી શકાય છે. તેથી લક્ષ્ય નક્કી કર્યા પછી જ તૈયારી શરૂ કરો.
પ્રથમ પ્રયાસમાં સફળતા : ખંડૌલી પોલીસ સ્ટેશન વિસ્તારના નાગલા અર્જુનના રહેવાસી આરબી સિંહ મૌર્ય રિટાયર્ડ જજ છે. તેમની 25 વર્ષીય પુત્રી શૈલજા અને 22 વર્ષીય પુત્ર સુધાંશની યુપી ન્યાયિક સેવામાં પસંદગી કરવામાં આવી છે. યુપી ન્યાયિક સેવા પરીક્ષાના જાહેર થયેલા પરિણામમાં શૈલજાએ 51 રેન્ક મેળવ્યો છે. જ્યારે સુધાંશે 276 રેન્ક મેળવ્યો છે. ભાઈ-બહેને ઘરે જ તૈયારી કરીને પ્રથમ પ્રયાસમાં જ આ પરીક્ષા પાસ કરવામાં સફળતા મેળવી છે.
યુવાનોને સંદેશ : રક્ષાબંધનના દિવસે જાહેર થયેલા પરિણામોમાં ભાઈ અને બહેન જજ બન્યા હોવાથી પરિવારમાં બેવડી ખુશી છે. શૈલજા અને સુધાંશુને ઉત્તર પ્રદેશ ન્યાયિક સેવા સિવિલ જજના જુનિયર ડિવિઝનમાં પસંદ કરવામાં આવ્યા છે. શૈલજા અને સુધાંશુની યુવાનોને સલાહ આપી હતી કે, ગભરાશો નહીં અને તમારું લક્ષ્ય નક્કી કરો. તે મુજબ અભ્યાસ અને મહેનત કરો જેનું પરિણામ ચોક્કસ મળે છે. સફળતા મેળવવા માટે કોઈ શોર્ટકટ નથી.