তিনিচুকীয়া,27 আগষ্ট:শনিবাৰে সন্ধিয়া তিনিচুকীয়া জিলাৰ ডাঙৰী সোণোৱাল কছাৰী জনজাতীয় ধাদুম গাঁৱত এক উখল মাখল পৰিৱেশৰ সৃষ্টি হয় ৷ কিয়নো গাঁৱখনৰ জীয়ৰী ডিকী সোণোৱালে গৌৰৱ কঢ়িয়াই আনিছে গাঁৱখনৰ লগতে তিনিচুকীয়া জিলালৈ ৷ ডিব্ৰুগড় বিশ্ববিদ্যালয়ত অধ্যয়নৰত ছাত্ৰী ডিকী সোণোৱালে উত্তৰ-পূৱৰ লগতে 50 টা বিভিন্ন ভাষাত 50 টা গান গাই এচিয়া বুক অফ ৰেকৰ্ড আৰু ইণ্ডিয়া বুক অফ ৰেকৰ্ডত নাম সন্নিৱিষ্ট কৰিবলৈ সক্ষম হৈছে ৷
এই সন্মান লাভ কৰাৰ পাচতে ডিব্ৰুগড় বিশ্ববিদ্যালয়ৰ পৰা নিজ গৃহত উপস্থিত হোৱাৰ পূৰ্বে প্ৰায় 10 কিলোমিটাৰ দূৰত্বৰ পথচোৱা সোণোৱাল কছাৰী ছাত্ৰ সন্থাকে ধৰি বিভিন্ন দল সংগঠনকে আদি কৰি গাঁৱৰ ৰাইজে বিপুল আদৰণি জনোৱাৰ লগতে গায়ন বায়নেৰে ডিকী সোণোৱালক আদৰণি জনায় ৷
পোন প্ৰথমবাৰৰ বাবে অঞ্চলটোলৈ এনে গৌৰৱ কঢ়িয়াই অনাৰ বাবে উৎসৱ মুখৰ পৰিৱেশৰ সৃষ্টি হয় ধাদুম গাঁৱত ৷ সৰুৰে পৰাই সংগীতৰ প্ৰতি হাবিয়াস আছিল ডিকীৰ । দৰিদ্ৰ কৃষক পৰিয়ালৰ কন্যা ডিকীয়ে প্ৰত্যাহ্বানৰ মাজেৰে সৰুৰে পৰা কৰি গৈছিল সংগীতৰ চৰ্চা । ডাঙৰী অঞ্চলৰ ললিত সোণোৱাল আৰু মমী সোণোৱালৰ কন্যা ডিকী সোণোৱাল । ঘৰখনত আৰু গাঁওখনত সংগীত চৰ্চাৰ কোনো পৰিৱেশ নথকা সত্ত্বেও স্থিতপ্রজ্ঞ ডিকীয়ে সংগীতৰ চৰ্চাৰ লগতে চলাই নিছিল অধ্যয়ন ।