চামগুৰি, 18 জুন : ৰাজ্যৰ লগতে নগাঁৱতো অব্যাহত আছে ড্ৰাগছ তথা নিচা জাতীয় সামগ্ৰীৰ বিৰুদ্ধে অভিযান ৷ প্ৰতিখন জিলাৰ জিলা প্ৰশাসনে ড্ৰাগছ বিৰোধী অভিযান চলাই থকাৰ সময়তে শুকুৰবাৰে লালি গুৰৰ বিৰুদ্ধে আৰক্ষী প্ৰশাসনে অভিযান চলাই নগাঁৱৰ চামগুৰিত ৷ এক গোপন সূত্ৰৰ খবৰৰ ভিত্তিত নগাঁও নগৰ শাখাৰ ভাৰপ্ৰাপ্ত আৰক্ষীয়ে নিশা চলোৱা অভিযানত আমনিৰ পৰা এখন চাৰিচকীয়া বাহনসহ বৃহৎ পৰিমানৰ লালি গুৰ জব্দ কৰাৰ লগতে চালকসহ এজন লোকক আটক কৰে আৰক্ষীৰ দলটোৱে ৷ নগাঁৱৰ 37 নং ৰাষ্ট্ৰীয় ঘাইপথেৰে দেৰগাঁৱলৈ লৈ গৈ থকা অৱস্থাতে AS-02-BC-8653 নম্বৰৰ বলেৰ' পিক আপ বাহনখন জব্দ কৰিবলৈ সক্ষম হয় আৰক্ষীয়ে ৷
উল্লেখ্য যে, দীৰ্ঘদিনৰ পৰা জিলাখনৰ বিভিন্ন প্ৰান্তত নানান অপৰাধজনিত ঘটনা সংঘটিত হৈ আহিছে যদিও লক্ ডাউনৰ সময়ছোৱাতে নতুনকৈ গঢ় লৈ উঠিছে বহু ড্ৰাগছৰ ঘাটি ৷ আবকাৰী বিভাগ তথা প্ৰশাসনৰ নিৰ্লিপ্ততাৰ সুযোগ লৈ একাংশ লোকে জিলাখনৰ অলিয়ে-গলিয়ে দীৰ্ঘদিনৰ পৰা চলাই আহিছে চুলাই মদৰ লগতে ড্ৰাগছৰ ৰমৰমীয়া বেহা ৷ এই বেহাই বহু ব্যক্তিৰ জীৱনলৈ অমানিশা নমাই আনিছে ৷ কিন্তু শেহতীয়াভাৱে আৰক্ষী অধীক্ষক হিচাপে আনন্দ মিশ্ৰই যোগদান কৰাৰ পাচতে ইয়াৰ বিৰুদ্ধে শেহতীয়াকৈ আৰক্ষী প্ৰশাসন অধিক সজাগ হোৱা দেখা গৈছে ৷