বকো, 17 অক্টোবৰ : ৰাজ্যত অব্যাহত থকা নেৰানেপেৰা বৰষুণৰ ফলত বৃদ্ধি পাইছে ব্ৰহ্মপুত্ৰৰ জলস্তৰ ৷ সমান্তৰালভাবে খহনীয়াই লৈছে ভয়াৱহ ৰূপ (River erosion at Boko) । ফলত অভাৱনীয় সমস্যাৰ মুখামুখি হৈছে নৈপৰীয়া ৰাইজ ৷ চলিত বাৰিষাতো বানৰ লগতে খহনীয়াই ৰাজ্যত বিস্তৰ ক্ষতিসাধন সধা পৰিলক্ষিত হৈছে । বিশেষকৈ বহুকেইখন নৈৰ ব্যাপক খহনীয়াৰ ফলত কৃষিভূমিৰ লগতে উছন গৈছে বিস্তৃত পথাৰ (Massive Erosion uprooted agricultural land) ৷
দক্ষিণ কামৰূপৰ বকোৰ সোণতলী পানীখাইটি অঞ্চলতো ব্ৰহ্মপুত্ৰ নদীৰ খহনীয়াই ধাৰণ কৰিছে তীব্ৰ ৰূপ (Massive Erosion in Boko)। যোৱা কিছুদিন ধৰি নৈপৰীয়া অঞ্চলখনত অব্যাহত থকা এই তীব্ৰ খহনীয়াই নৈপৰীয়া ৰাইজৰ নিদ্ৰাহৰণ কৰিছে । ব্ৰহ্মপুত্ৰৰ খহনীয়াৰ কবলত পৰি ইতিমধ্যে নদীৰ বুকুত জাহ গৈছে শ শ বিঘা কৃষি ভূমিকে ধৰি বহু পৰিয়ালৰ ভেটি-মাটি ৷ ইয়াৰ উপৰিও নাবাৰ্ডৰ কোটি টকীয়া আঁচনি এটাও ইতিমধ্যে খহনীয়াৰ কবলত পৰিছে ।
সমষ্টিবাসীৰ এনে দুৰ্যোগময় পৰিস্থিতিত দেওবাৰে বকো সমষ্টিৰ বিধায়িকা নন্দিতা দাসে খহনীয়াগ্ৰস্ত এলেকা পৰিদৰ্শন কৰি নৈপৰীয়া খহনীয়াগ্ৰস্ত লোকৰ পৰিস্থিতিৰ বুজ লয় । বকোৰ সোণতলী পানীখাইটিৰ খহনীয়াগ্ৰস্ত এলেকা পৰিদৰ্শন কৰি বিধায়িকাগৰাকীয়ে অচিৰেই গৰাখহনীয়াগ্ৰস্থ এলেকা গৰাখহনীয়াৰ পৰা ৰক্ষা কৰিবলৈ ব্যৱস্থা গ্ৰহণ কৰিব বুলি আশ্বাস প্ৰদান কৰে । লগতে কাষৰীয়া অঞ্চলটোক খহনীয়াৰ পৰা ৰক্ষা কৰিবলৈ স্থায়ী প্ৰতিৰোধক ব্যৱস্থা গ্ৰহণৰ বাবে প্ৰয়োজনীয় ব্যৱস্থা ল’বলৈ বিভাগীয় অভিযন্তাক নিৰ্দেশ প্ৰদান কৰে ।