গোলাঘাট, 22 ডিচেম্বৰ :গোলাঘাট জিলাত ভয়ংকৰ ঘটনা । স্বামীৰ শাৰীৰিক-মানসিক নিৰ্যাতনৰ বলি হৈ আত্মহত্যাৰ চেষ্টা চলালে পত্নীয়ে ৷ বুধবাৰে দিনৰ ভাগত অসুস্থ হৈ আছিল মহিলাগৰাকী ৷ তাৰ পিচতে মহিলাগৰাকীক চিকিৎসালয়লৈ লৈ যোৱা হয় ৷ চিকিৎসকলে মহিলাগৰাকীক খাবলৈ দিয়া চাৰিটা ভিন ভিন দৰৱ দিছিল ৷ পুলিবৰ স্থিত CRPF হেড কোৱাৰ্টাৰৰ ঘৰলৈ আহিয়েই মহিলাগৰাকীয়ে সেই নিশাই ভিন ভিন টেবলেটৰ সম্পূৰ্ণ চাৰিটা ষ্ট্ৰিপ সেৱন কৰি আত্মহত্যাৰ চেষ্টা চলায় ৷ মহিলাগৰাকীৰ স্বামী পেচাত এগৰাকী CRPF ৰ বিষয়া । গোলাঘাট জিলাৰ উৰিয়ামঘাটৰ C sector ত নিয়োজিত CRPF ৰ সহকাৰী কামাণ্ডেন্ট শ্ৰীকান্ত ৷
এই ঘটনাৰ পিচতে সংকটজনক অৱস্থাত মহিলাগৰাকীক গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত ভৰ্তি কৰা হৈছে । ইয়াৰোপৰি তেলেংগানাৰ হাইদৰাবাদৰ নিৱাসী মহিলাগৰাকীৰ মাতৃকো মানসিক আৰু শাৰিৰীকভাৱে নিৰ্যাতন চলোৱাৰ অভিযোগ উত্থাপিত হৈছে CRPF বিষয়া শ্ৰীকান্তৰ বিৰুদ্ধে । এই ঘটনাই এতিয়া জিলাখনত তীব্ৰ প্ৰতিক্ৰিয়াৰ সৃষ্টি কৰিছে ৷
মহিলাগৰাকীয়ে কোৱা অনুসৰি, শ্ৰীকান্তৰ সৈতে তেওঁ দুবছৰৰ পূৰ্বে বিবাহপাশত আৱদ্ধ হৈছিল ৷ কিন্তু তেওঁলোকৰ বিবাহ আইনী প্ৰক্ৰিয়াৰে ৰেজিষ্টাৰে হোৱা নাছিল ৷ তাৰ পিচতে তেওঁৰ স্বামীয়ে তেওঁক বিবাহ বিচ্ছেদৰ কথা কৈছিল ৷ স্বামীয়ে পত্নীৰ বিৰুদ্ধে ভুৱা ডিভৰ্ছ কেচ ফাইল কৰিছে ৷ আনকি স্বামীৰ মাতৃয়েও তেওঁক যৌতুক আৰু সোণৰ বাবে শাৰীৰিক লগতে মানসিক নিৰ্যাতন কৰি আহিছে বুলি অভিযোগ উত্থাপন কৰিছে ৷ আনকি তেওঁৰ স্বামীয়ে তেওঁক অন্তঃসত্বা হ’বলৈ নিদি দুবাৰকৈ গৰ্ভপাত কৰোৱাৰো গুৰুতৰ অভিযোগ উত্থাপন হৈছে ৷ স্বামীয়ে পত্নীক মানসিকভাৱে বিকাৰগ্ৰস্ত বুলি বাৰে বাৰে প্ৰাণ কৰিবলৈ বিচাৰিছিল ৷