لکھنو: بھارتی کرکٹ ٹیم کے تیز گیند باز محمد شامی نے سیمی فائنل میں نیوزی لینڈ کے خلاف سات وکٹ حاصل کر اپنی صلاحیت کا شاندار مظاہرہ کیا ہے اس سلسلے میں محمد شامی کا نام سرخیوں میں ہے، یو پی حکومت نے اعلان کیا ہے کہ امروہہ میں واقع محمد شامی کے گاؤں میں منی کرکٹ اسٹیڈیم بنایا جائے گا تاکہ کرکٹ کو فروغ دیا جا سکے اور محمد شامی سے متاثر ہو کر کے دیگر نوجوان بھی کرکٹ کے میدان میں قدم رکھیں۔

ای ٹی وی بھارت سے بات چیت کرتے ہوئے اتر پردیش حکومت میں وزیر مملکت دانش آزاد انصاری نے بتایا کہ جس طریقے سے محمد شامی نے اپنے صلاحیت کا مظاہرہ کیا اور بھارتی ٹیم کو فتح دلوایا ہے وہ ناقابل بیان ہے یہی وجہ ہے کہ حکومت نوجوانوں کی فلاح و بہبود کے پیش نظر محمد شامی کو نظیر بنا کے ان کے گاؤں میں کرکٹ سٹیڈیم بنانا چاہتی ہے اس کے لیے مقامی افسران نے زمین کا معائنہ کیا ہے اور جلد ہی بجٹ کا الاٹمنٹ کر دیا جائے گا۔

یہ بھی پڑھیں: ورلڈ کپ فائنل: کے ایل راہل کی نصف سنچری، بھارت کے 37 اوورز میں 5 وکٹ پر 179 رنز

انہوں نے بتایا کہ بھارتی کرکٹ ٹیم کو سیمی فائنل میں فتح دلواکر کے فائنل میں پہنچانے میں بہت بڑا کردار محمد شامی کا رہا ہے لہذا ہم بھارتی کرکٹ ٹیم کو مبارکباد پیش کرتے ہیں اور امید ہے کہ فائنل میں بھی بھارتی کرکٹ ٹیم کو فتح حاصل ہوگی۔ انہوں نے مزید کہا کہ اب تک روایت رہی ہے کہ شہروں میں حکومتوں نے کرکٹ اسٹیڈیم یا دیگر کھیلوں کے اسٹیڈیم تعمیر کروایا ہے اور یہی وجہ رہی ہے کہ گاؤں کے نوجوان اور صلاحیت مند افراد کو اپنی صلاحیت نکھارنے کا موقع نہیں ملا لیکن اب یوپی سرکار نے فیصلہ کیا ہے کہ گاؤں میں منی سٹیڈیم تعمیر کرا کے کرکٹ کو فروغ دیا جائے گا۔