لکھنو: اتر پردیش پولیس کے ذریعے عبادت گاہوں پر لگائے گئے لاؤڈ سپیکر کو ہٹانے کی کارروائی کی جارہی ہے۔ اس کے لیے یو پی پولیس کی خصوصی ہدایت ہے کہ روزانہ صبح پانچ بجے سے سات بجے تک ریاست کے سبھی اضلاع میں سینیئر افسران کے قیادت میں عوامی مقامات و مذہبی مقامات پر نصب لاؤڈ سپیکر و امپلیفائر ڈیوائسز کے خلاف خاص مہم چلا کر کاروائی کی جا رہی ہے۔ گزشتہ دنوں میں اس مہم کے تحت 61399 مذہبی مقامات پر لگے لاؤڈ سپیکر کی جانچ کی گئی جس میں 7288 لاؤڈ سپیکر کی اواز کم کرائی گئی جبکہ 3238 اسپیکرز مذہبی مقامات سے اتروائے گئے۔
سما ج وادی پارٹی کے ریاستی صدر نریش اتم پٹیل نے ای ٹی وی بھارت اردو سے خاص بات چیت کرتے ہوئے کہا کہ اتر پردیش حکومت ایک خاص طبقے کو نشانہ بنانا چاہ رہی ہے۔اس مہم کے پیچھے حکومت کے سیاسی عزائم ہیں۔ انہوں نے کہا کہ 2024 کے پارلیمانی انتخابات کے پیش نظر حکومت فرقہ وارانہ ماحول بنا رہی ہے۔ یہی وجہ ہے کہ اس مہم سے زیادہ تر مساجد متاثر ہو رہے ہیں جو کہ افسوسناک ہے۔
ان کاکہنا ہے کہ ریاست کے کئی شاہرہوں پر بی جے پی اپنی پرچار اور اشتہارات کے لیے بڑے بڑے لاؤڈاسپیکرز کی لاؤڈ نصب کیے ہے جن کا شورو غل نہ صرف راہ گیروں کو متاثر کر رہی ہے بلکہ پورے ابادی کو متاثر کر رہی ہے کیا اس کے خلاف بھی کوئی مہم چلائی جائے گی یا صرف عبادت گاہوں کو ہی نشانہ بنایا جائے گا۔
یہ بھی پڑھیں:مظفر نگر میں مذہبی مقامات پر لاؤڈ اسپیکر کے استعمال پر پولیس کی کارروائی
وہیں سماجوادی پارٹی سے رکن اسمبلی سمرپال نے ای ٹی وی بھارت سے خاص بات چیت کرتے ہوئے کہا کہ امروہہ مراد آباد مغربی اتر پردیش کے علاقوں میں اس مہم سے زیادہ تر مساجد متاثر ہیں۔ کئی لوگ ہمارے پاس بھی اس کی شکایت کرنے آئے تھے۔ انہوں نے مزید کہا کہ تین دن اسمبلی اجلاس جاری رہے گا۔ اس دوران اسمبلی کے قانون کے مطابق درخواست دے کر کے لاؤڈ سپیکر کے خلاف ہو رہی کاروائیوں پر آواز بلند کریں گے اور اسے روکنے کا مطالبہ کریں گے۔
