میرٹھ: اترپردیش کے ضلع میرٹھ کی سات اسمبلی سیٹوں کے لیے جہاں 10 فروری کو ووٹ ڈالیں جائیں گے، وہیں اس کے لیے سبھی سیاسی جماعتیں اپنے انداز میں عوام سے ووٹ کی اپیل بھی کر رہی ہیں۔ ایسے میں میرٹھ میں وزیر اعظم نریندر مودی کی تصویر والی ساڑی بازار میں سبھی کی توجہ کا مرکز بنی ہوئی ہے۔ PM Modi's Print Sarees being Sold in Meerut Market
اس ساڑی کو خاص طور پر گجرات سے یوپی الیکشن کے لئے منگوایا گیا ہے تاکہ الیکشن میں بی جے پی کو اس کا فائدہ مل سکے۔
خاص بات یہ ہے اس ساڑی میں وزیر اعظم کی تصویر کے ساتھ بھارتی افواج کو بھی دکھایا گیا ہے۔ اپنے شوروم کے دروازے پر سجائی گئی اس ساڑی کی وجہ بتاتے ہوئے دکاندار کا کہنا ہے کہ بازار میں اس طرح کی یہ پہلی ساڑی ہے۔ اس کو خاص طور پر الیکشن کے لئے ہی تیار کیا گیا ہے تاکہ عوام اس سے متاثر ہو سکیں۔
خاص بات یہ ہے کہ اس کی قیمت بھی بالکل کم رکھی گئی ہے، جسے سبھی لوگ خرید سکیں اور اس کا صرف مقصد الیکشن میں بی جے پی کے لیے راہ ہموار کرنا ہے۔
واضح رہے کہ یوپی اسمبلی انتخابات 2022 کے لیے جس طرح سے سیاسی سرگرمیاں عروج پر ہیں، وہیں وزیراعظم کی تصویر والی ساڑی بی جے پی کو کتنا مدد پہنچا پاتی ہے یہ بھی دیکھنے والی بات ہوگی۔
