ریاست اترپردیش کے دارالحکومت لکھنؤ میں بابری مسجد انہدام کیس معاملے پر سی بی آئی کی خصوصی کورٹ میں تھوڑی دیر بعد فیصلہ سنایا جائے گا، جبکہ فیصلہ آنے سے پہلے ہی ساکشی مہاراج کے وکیل پرشانت سنگھ اٹل نے کہا کہ ہمیں پورا یقین ہے سبھی لوگ بے گناہ ثابت ہوں گے۔
ای ٹی وی بھارت سے بات چیت کے دوران پرشانت سنگھ اٹل نے بتایا کہ 'میں ساکشی مہاراج کا وکیل ہوں، مجھے پورا یقین ہے کہ سی بی آئی کورٹ کا فیصلہ ہمارے حق میں آئے گا'۔
انہوں نے مزید کہا کہ 'بابری مسجد معاملے میں اس وقت کی موجودہ حکومت نے جان بوجھ کے سی بی آئی پر دباؤ ڈال کر کیس فائل کروایا تھا'۔
انہوں نے کہا کہ 'ہمیں پورا بھروسہ ہے کہ سارے ملزمین بے قصور ثابت ہوں گے'۔
انہوں بتایا کہ 'ساکشی مہاراج تھوڑی دیر بعد کورٹ پہنچے والے ہیں،کورٹ کے فیصلے کے پیش نظر پولیس فورس پہلے سے ہی تعینات کر دی گئی ہے۔
واضح رہے کہ ملزمین میں بی جے پی کے سینیئر رہنما لال کرشن اڈوانی، مرلی منوہر جوشی، اترپردیش کے سابق وزیراعلی کلیان سنگھ، مدھیہ پردیش کی سابق وزیراعلی اما بھارتی اور دوسرے لوگ شامل ہیں۔
کورونا وبا کے پیش نظر لال کرشن اڈوانی، مرلی منوہر جوشی، کلیان سنگھ، اما بھارتی اور دوسرے عمر دراز ملزمین کو عدالت میں پیش نہ ہونے پر چھوٹ دی گئی ہے۔
