Sangeet Som Controversial Statement بھارت میں بھی حماس جیسی تنظیم بن رہی ہے، سنگیت سوم کا متنازع بیان

میرٹھ: اترپردیش کے میرٹھ میں ایک پروگرام میں حصہ لینے آئے بی جے پی رہنما اور سابق ایم ایل اے سنگیت سوم نے متنازع اور اشتعال انگیز بیان دیتے ہوئے اقلیتی اداروں اور مسلمانوں کو نشانہ بنایا ہے۔ اس موقع پر انہوں نے تقریر کرتے ہوئے کہا کہ 'بھارت میں بھی حماس جیسی تنظیموں کے قیام کے لیے فنڈ ​​جمع کیا جا رہا ہے، اسے روکا جانا چاہیے۔' انہوں نے اشتعال انگیز بیان دیتے ہوئے مزید کہا کہ 'علی گڑھ مسلم یونیورسٹی جیسے ادارے صرف دہشت گردی کا سبق پڑھا رہے ہیں۔ علی گڑھ مسلم یونیورسٹی کو تالا لگا دیا جائے۔'

اتوار کو میرٹھ کے ساکیت اسپورٹس کلب میں شتریہ چیتنا چنتن شیویر کا انعقاد کیا گیا۔ اس پروگرام میں سردھنا کے سابق ایم ایل اے اور متنازع بیان بازی کے لیے مشہور بی جے پی رہنما سنگیت سوم نے شرکت کی۔ انہوں نے کہا کہ 'حماس کی حمایت کرنے والے بھی دہشت گرد ہیں۔ اے ایم یو سے لے کر کشمیر تک حماس کے لیے نعرے لگائے جا رہے ہیں۔ اے ایم یو جیسے ادارے صرف دہشت گردی کا سبق پڑھا رہے ہیں۔' انہوں نے کہا کہ حماس جس طرح اسرائیل پر راکٹ داغ رہا ہے، ویسی ہی صورت حال بھارت کی بھی ہوتی لیکن یہاں کیونکہ ملک کی باگ ڈور نریندر مودی کے ہاتھ میں ہے، اس لیے یہاں ایسا ممکن نہیں ہے۔' انہوں نے مزید کہا کہ 'جو بھی حماس کا ساتھ دے رہے ہیں، وہ ملک چھوڑ دیں۔'

سنگیت سوم نے متنازع بیان جاری رکھتے ہوئے کہا کہ 'ایک مخصوص برادری ہر ہفتے پورے ملک میں چندہ جمع کر رہی ہے۔ اس کی تحقیقات ہونی چاہیے۔ انہیں لگتا ہے کہ اس پیسے سے حماس جیسی تنظیم بنائی جا رہی ہے۔ سنگیت سوم نے کہا کہ اس سے پہلے بھی انہوں نے لو جہاد کا مسئلہ اٹھایا تھا جو درست نکلا۔ اب اس معاملے کی بھی تحقیقات ہونی چاہیے۔'