یوم جمہوریہ کے موقع پر تلنگانہ میں رسم پرچم کشائی کی مرکزی تقریب کوویڈ کے وبائی حالات کی وجہ سے مختصر کردی گئی۔ گورنر تلنگانہ ڈاکٹر تمیلی سائی سوندرا راجن نے حیدرآباد میں واقع راج بھون میں صبح 7 بجے رسم پرچم کشائی انجام دی۔ اس تقریب میں محدود شخصیات نے شرکت کی۔ Republic Day Celebration at Telangana Bhavan
اس موقع پر خطاب کرتے ہوئے گورنر نے عوام اور فرنٹ لائن وارئیرس کو یوم جمہوریہ کی مبارکباد پیش کی۔
انہوں نے کہا کہ یوم جمہوریہ کا جذبہ عوام تک لے جانے کی ضرورت ہے۔ ہمارا دستور، دنیا کا بہتر دستور ہے۔ انہوں نے اسے بہتر بنانے والے فلسفیوں کو خراج بھی پیش کیا۔ انہوں نے مزید کہا کہ ملک، ٹیکہ اندازی میں دنیا میں آگے ہے۔ جلد ہی کوویڈ کے ڈوز 200 کروڑ مکمل کرلئے جائیں گے۔ انہوں نے حیدرآباد کے طبی مرکز کے طور پر ابھرنے پر بھی مسرت کا اظہار کیا۔
انہوں نے کہاکہ تلنگانہ ریاست تعلیمی نظام میں بھی آگے ہے اور یہ ملک میں چاول کی پیداوار کے مرکز کے طورپر ابھری ہے۔انہوں نے کہاکہ مختلف شعبہ جات میں تلنگانہ تیزی کے ساتھ آگے بڑھ رہی ہے۔انہوں نے کہاکہ اختراعی ماحول دوست نظام کے لئے کوششوں کی وجہ سے تلنگانہ اختراعی مرکز کے طورپر بھی ابھررہی ہے اور خود مکتفی ہندوستان میں اپنے رول کے لئے ریاست قیادت کررہی ہے۔انہوں نے عوام پر زوردیا کہ وہ معیاری تعلیم، اختراعات، تحقیق، ترقی اور انٹرپرینرشپ کے ذریعہ خودمکتفی ہندوستان کے لئے اپنا رول ادا کریں۔
تعلیم، صحت، تغذیہ، انٹرپرینرشپ اور خواتین میں ملازمتوں کے مواقع کو فروغ دینا تلنگانہ ریاست اور ملک کی تیز تر ترقی کے لئے اہم ہے۔
انہوں نے کہا کہ یوم جمہوریہ دستورکی بالادستی کی اہمیت کا اظہار ہے۔ملک جمہوریہ کے طورپر اپنے سفر کو جاری رکھے ہوئے ہے جہاں کے عوام اپنی اجتماعی مساعی کے ذریعہ ملک کی قسمت سنوارسکتے ہیں۔ہمارے ملک کا دستور جامع اور دنیا کے بہترین دستوروں میں سے ایک ہے۔ ہندوستانی دستور نے دنیا کی بڑی اورچمکدار جمہوریت کو شکل دی ہے۔
- مزید پڑھیں:تلنگانہ بھون میں یوم جمہوریہ تقریب
انہوں نے عوام پر زوردیا کہ وہ ایک دوسرے کا احترام کرین، انصاف،آزادی،مساوات اور بھائی چارہ کو فروغ دیں جس کی ضمانت دستور میں دی گئی ہے۔انہوں نے کہاکہ ترقی،پیداوار اور ٹیکوں کی مفت تقسیم ہندوستان کو خود مکتفی بنانے کی حقیقی گواہی ہے۔بغیر کسی رکاوٹ کے دنیا کی سب سے بڑی ٹیکہ اندازی کی مہم کے لئے ملک کی مدد کرنے والے سائنسدانوں،ڈاکٹرس،نیم طبی اہلکار، نرسس اور دیگر فرنٹ لائن ورکرس کو سلام کرنے کا یہ وقت ہے۔اس بات پر زوردیتے ہوئے کہ ترقی کے ثمرات عوام کے تمام طبقات تک پہنچیں، انہوں نے پچھڑے طبقات پر خصوصی توجہ کے ساتھ تمام کو مساوی مواقع فراہم کرنے کے لئے مسلسل مساعی کی ضرورت کو بھی اجاگر کیا۔
یو این آئی
