تلنگانہ پردیش کانگریس کمیٹی صدر کے عہدہ پر ریونت ریڈی کے تقرر کے فوری بعد کئی رہنماؤں نے اپنی ناراضگی کا کھل کر اظہار کیا۔
سابق رکن اسمبلی کے لکشما ریڈی نے پارٹی کی رکنیت سے استعفیٰ دے دیا جب کہ رکن پارلیمان کومٹ ریڈی وینکٹ ریڈی نے سنسنی خیز ریمارک میں آئندہ گاندھی بھون کی سیڑھی نہ چڑھنے کا اعلان کیا۔
کومٹ ریڈی وینکٹ ریڈی صدارت کی دوڑ میں شامل تھے اور انہیں ہنمنت راؤ کے بشمول بعض رہنماؤں کی تائید حاصل تھی۔ کومٹ ریڈی وینکٹ ریڈی نے کہا کہ تلگودیشم سے آنے والے رہنماؤں سے وہ ملاقات نہیں کریں گے۔
انہوں نے ریمارک کیا کہ تلنگانہ پی سی سی اب ٹی ڈی پی۔ پی سی سی میں تبدیل ہوچکی ہے۔ ووٹ برائے نوٹ کی طرح نوٹ برائے پی سی سی بن چکی ہے۔ وینکٹ ریڈی نے الزام عائد کیا کہ انچارج جنرل سکریٹری مانکیم ٹیگور نے پی سی سی کو فروخت کردیا۔ وینکٹ ریڈی اب اپنے ضلع اور حلقہ تک محدود رہیں گے۔
انہوں نے کہا کہ سیاسی مستقبل کا کارکن فیصلہ کریں گے۔ انہوں نے سونیا گاندھی و راہول گاندھی پر تنقید سے گریز کیا۔ واضح رہے کہ ریونت ریڈی کے خلاف کومٹ ریڈی وینکٹ ریڈی نے کئی مرتبہ ہائی کمان سے نمائندگی کی تھی۔ جب کہ ریونت ریڈی کے تقرر کے اعلان کے ساتھ ہی سابق رکن اسمبلی کے لکشما ریڈی نے استعفیٰ کا اعلان کردیا۔
