چنئی: تمل ناڈو کے وزیر اعلی ایم کے اسٹالن نے ہفتہ کے روز مرکزی حکومت کے ذریعہ تمام ریاستی زبانوں میں سی اے پی ایف کے امتحانات منعقد کرنے کے اعلان کا خیرمقدم کیا اور تمام مرکزی امتحانات میں تمل اور دیگر ریاستی زبانوں میں پرچہ سوالات تیار کرنے کے اپنے مطالبے کو دہرایا۔ اسٹالن نے ٹویٹ کیا، مرکزی وزیر داخلہ امت شاہ کو بھیجے گئے خط کے جواب میں مرکزی حکومت نے اعلان کیا ہے کہ وہ تمام ریاستی زبانوں میں سی اے پی ایف کے امتحانات منعقد کرے گی۔انہوں نے مزید کہا، 'میں اس فیصلے کا تہہ دل سے خیرمقدم کرتا ہوں اور مرکزی حکومت کے تمام امتحانات میں تمل اور دیگر ریاستی زبانوں میں پرچہ سوالات فراہم کرنے کے اپنے مطالبے کا اعادہ کرتا ہوں۔'
اس سے قبل ایم کے اسٹالن نے مرکزی وزیر داخلہ امت شاہ سے تمل اور دیگر علاقائی زبانوں کو سی اے پی ایف بھرتی کے لیے کمپیوٹر ٹیسٹ میں شامل کرنے کی درخواست کی تھی۔ امت شاہ کو لکھے گئے خط میں جس کی کاپیاں یہاں میڈیا کو جاری کی گئیں۔ انہوں نے مرکز کے اس نوٹفکیشن کو 'امتیازی' اور 'یکطرفہ' قرار دیا تھا، جس میں صرف انگریزی اور ہندی کے استعمال کو لازمی قرار دیا گیا ہے۔ سی اے پی ایف کا یہ امتحان تامل ناڈو سے 579 سمیت 9,212 آسامیوں کو پر کرنے کے لئے پورے ملک کے 12 مراکز میں ہوگا۔
یو این آئی
