سرینگر: انجمن اوقاف جامع مسجد سرینگر نے اس امر پر نہایت ہی فکر اور تشویش کا اظہار کیا ہے کہ گزشتہ چار سال سے مسلسل عظیم معراج النبیﷺ کی تقریب نہ تو مرکزی جامع مسجد اور نہ ہی تاریخی عالی مسجد عیدگاہ سرینگر میں ہوپارہی ہے کیونکہ سربراہ انجمن میر واعظ کشمیر حکام کی جانب سے غیر قانونی اور غیر اخلاقی طور پر پوری سختی کے ساتھ نظربند رکھے گئے ہیں۔ بیان میں کہا گیا کہ موصوف کی لگاتار نظر بندی اور قدغنوں کے سبب مسلمانان کشمیر کو معراج النبی ﷺ کے عظیم تقریب کے تعلق سے میر واعظ کشمیر کے مواعظ حسنہ سے محروم رکھا جارہا ہے جبکہ اس دوران کوئی بھی دینی، ملی، اصلاحی، دعوتی اور تبلیغی اجتماع کو ناممکن بنا دیا گیا ہے جو حد درجہ افسوسناک، مذہبی معاملات کے صریح مداخلت، اظہار رائے کی آزادی پر قدغنوں کے مترادف ہے اور حکام کا یہ رویہ قابل مذمت ہے۔
بیان میں کہا گیا کہ جناب میرواعظ کی نظر بندی کے سبب عوام میں نہ صرف شدید مایوسی اور اضطراب پایا جارہا ہے بلکہ وہ اس عمل کو انتہائی افسوسناک اور ناقابل قبول سمجھتے ہیں۔انجمن نے معراج النبی ﷺ کے مناسبت سے عوام الناس کو مبارکباد پیش کرتے ہوئے کہا کہ معراج عالمﷺ رسول رحمت ﷺ کا ایک عملی معجزہ ہے جسے تا قیام قیامت یادگار کے طور پر منایا جاتا رہیگا اور فکر و نظر کے نئے نئے گوشے اس سے اجاگر ہوتے رہیں گے۔ بیان میں حکام پر پھر زور دیا کہ وہ ماہ شعبان اور شب برات کی تقریبات کی آمد کے موقعہ پر جناب میرواعظ کی فوری رہائی کو یقینی بنائیں تاکہ موصوف اپنے اکابر و اسلاف کے طرز عمل پر عوام کے تئیں اپنی منصبی ذمہ داریاں پوری کرسکیں۔
واضح رہے کہ علیٰحدگی پسند رہنما میر واعظ مولوی محمد عمر فاروق کو اگست 2019 میں جموں و کشمیر سے دفعہ 370 اور 35 اے کے خاتمے سے قبل انتظامیہ نے گھر میں نظر بند کر دیا گیا تھا جس کے بعد سے میر واعظ آج بھی گھر میں نظر بند ہیں۔
مزید پڑھیں: Detention of Mirwaiz شب معراج پر بھی میرواعظ کی رہائی عمل میں نہ لانا قابل مذمت، انجمن اوقاف
