سرینگر: نیشنل کانفرنس کے نائب صدر عمر عبداللہ نے جمعرات کے روز کہا کہ 'ان کی جماعت نے روز اول سے ہی عوام کو طاقت کا سرچشمہ سمجھا اور ہمیشہ اس بات میں یقین رکھا کہ سرداری عوام کا حق ہے اور این سی آج بھی اسی اصول پر چٹان کی طرح قائم و دائم ہے۔' ان باتوں کا اظہار پارٹی کے نائب صدر عمر عبداللہ نے اپنی رہائش گاہ واقع گپکار میں وادی کے مخلتف علاقوں سے آئے ہوئے عوامی وفود، معزز شہریوں، پارٹی لیڈران، عہدیداران اور دیگر کارکنان کے ساتھ ملاقات کے دوران کیا۔
انہوں نے کہا کہ جموں وکشمیر کے عوام اس وقت زبردست چیلنجز، مسائل اور مشکلات کا سامنا ہے۔ ایسے میں اب لوگوں کو بنیادی سہولیات سے بھی محروم رکھا جارہا ہے۔ بجلی اور پینے کے پانی کی سپلائی صورتحال پر بات کرتے ہوئے انہوں نے کہا کہ حکومت کی تمام تر توجہ سمارٹ میٹر نصب کرنے کی طرف مرکوز تو ہے لیکن سپلائی پوزیشن بہتر کرنے کی طرف کوئی بھی دھیان نہیں دیا جارہا ہے، تاکہ عوام کو راحت ملے۔ Omar Abdullah On Installing Meters
مزید پڑھیں:
انہوں نے کہا کہ موجودہ سپلائی پوزیشن میں سمارٹ میٹر نصب کرنے کا کوئی جواز ہی نہیں بنتا کیونکہ پہلے 24 گھنٹے بجلی اور پانی کی سپلائی یقینی بنایا جانا چاہیے پھر سمارٹ میٹر نصب کرنے کی بات کی جانی چاہیے۔ عمر عبداللہ نے مزید کہا کہ نیشنل کانفرنس ہمیشہ امن و آشتی، بھائی چارہ، ریاست کی وحدت، انفرادیت اور شناخت قائم رکھنے میں تاریخی رول ادا کرتی رہی ہے اور لوگوں کے آئینی اور جمہوری حقوق کی محافظ جماعت رہی ہے اور یہ جماعت آگے بھی اپنے اصولوں پر کار بند رہے گی۔
