رام بن: صوبہ جموں کے پہاڑی ضلع رام بن میں فوج نے محکمہ سیاحت کے تعاون سے سب ڈویژن رامسو کے پوگل علاقے میں تین روزہ ٹریکنگ گروپ کو جھنڈی دکھا کر روانہ کیا۔ ٹریکنگ گروپ کو روانہ کرتے ہوئے ٹریکرز میں کافی جوش و خروش دیکھنے کو ملا جبکہ اس موقع پر مقامی باشندوں، پی آر آئی ممبران سمیت فوج اور سیول انتظامیہ کے افسران بھی موجود تھے۔
منتظمین نے بتایا کہ مختلف طبقہ ہائے زندگی سے تعلق رکھنے والے 16 ٹریکرز کو منتخب کیا گیا ہے جن میں دو خواتین ٹریکر بھی شامل ہیں۔ یہ ٹریک پوگل پریستان کی خوبصورت وادی پوگل سے شروع ہوئی اور رات کو گروپ سر گلی کے مقام پر قیام کرے گا۔ بعد ازیں ٹریکنگ ٹیم ونبراہ، ہسراج کی خوبصورت قدرتی مناظر سے لطف اندوز ہوتے ہوئے اپنے آخری پڑاؤ کی اور روانہ ہوگا۔ منتظمین کا کہنا ہے کہ اس طرح کی ٹریکنگ سے نہ صرف سیاحتی سرگرمیوں کو فروغ ملے گا بلکہ اس سے ٹریکرز میں حب الوطنی کا بھی جذبہ ابھرے گا۔
مزید پڑھیں: Pir panjal Trekking : فوج اور محکمہ ٹورزم کے زیر اہتمام ٹریکنگ کا اہتمام
مقامی پی آر آئی ممبر، کرلیپ سنگھ نے میڈیا نمائندوں کے ساتھ بات چیت کے دوران اس اقدات کو خوش آئند قرار دیتے ہوئے مستقبل میں بھی اس طرح کے مزید پروگرامز ترتیب دینے کی امید ظاہر کی۔ انہوں نے کہا کہ وادی کشمیر کی طرح خطہ چناب میں بھی کئی سیاحتی مقامات ہیں جن کو سیاحتی نقشے پر لانے سے نہ صرف مقامی باشندوں بلکہ مجموعی طور جموں و کشمیر کی معیشت بھی مستحکم ہوگی۔
