جموں: جموں و کشمیر کے ضلع راجوری میں عسکریت پسندوں کی سرگرمیوں میں غیر معمولی اضافہ ہونے کے درمیان ہفتے کے روز فوج، پولیس اور سیول آفیسران کی ایک اعلیٰ سطح کی میٹنگ منعقد ہوئی جس دوران عسکریت پسندوں کے منصوبو ں کو ناکام بنانے کی خاطر نئی حکمت عملی ترتیب دی گئی۔ معلوم ہواہے کہ اے ڈی جی پی جموں مکیش سنگھ نے ہفتے کے روز راجوری میں ایک اعلیٰ سطح کی سیکورٹی میٹنگ کی صدارت کی جس میں فوج، پولیس اور سول انتظامیہ سے وابستہ آفیسران نے بھی شرکت کی۔ A High Level Meeting In Rajouri
پولیس ذرائع نے بتایا کہ میٹنگ کے دوران ضلع راجوری میں سرگرم ملی ٹینٹوں اور اُن کے معاونین کے خلاف بڑے پیمانے پر آپریشن شروع کرنے کا فیصلہ لیا گیا۔ ذرائع نے بتایا کہ اس اعلیٰ سطح کی میٹنگ کے دوران اے ڈی جی پی جموں مکیش سنگھ کو بتایا کہ درہال میں فدائین حملے کے بعد ضلع بھر میں سیکورٹی کو مستعد رہنے کے احکامات صادر کیے گئے ہیں۔ ذرائع نے مزید کہا کہ رجواری میں تعینات پولیس کے سینئر آفیسران نے بتایا کہ جنگلی علاقے میں جنگجوؤں اور فورسز کے مابین گولیوں کے مختصر تبادلے کے بعد ملی ٹینٹ فرار ہوگئے جن کی بڑے پیمانے پر تلاش جاری ہے۔
انہوں نے کہاکہ کسی کو بھی ضلع راجوری میں امن و امان کو درہم برہم کرنے کی اجازت نہیں دی جائے گی۔ ذرائع نے بتایا کہ اعلیٰ سطح کی میٹنگ کے دوران جنگجووں کے امکانی حملوں کو ٹالنے کے لیے نئی حکمت عملی ترتیب دی گئی ہے۔ معلوم ہوا ہے کہ اے ڈی جی پی جموں مکیش سنگھ نے پولیس اور دیگر سیکورٹی ایجنسیوں کے درمیان قریبی تال میل پر زور دیتے ہوئے کہاکہ ملی ٹینسی کا قلع قمع کرنے کی خاطر سخت اقدامات اُٹھانے کی ضرورت ہے۔ اُن کا مزید کہنا تھا کہ راجوری میں جگہ جگہ سیکورٹی فورسز کی تعیناتی عمل میں لائی گئی اور مشکوک نظر آنے والے ہر شہری کی باریک بینی سے تلاشی لی جارہی ہیں۔
یو این آئی
