پلوامہ: جموں وکشمیر پولیس جہاں ایک جانب منشیات مخالف کاروائیاں جاری رکھے ہوئے ہیں۔ وہیں دوسری جانب آئے روز منشیات کے کاروبار سے منسلک افراد کو پکڑنے میں کامیابی حاصل کر رہی ہے، جس کا مقصد جموں و کشمیر کو منشیات سے پاک بنانا ہے۔ اسی سلسلے کو جاری رکھتے ہوئے پلوامہ پولیس نے سوک ایکشن پروگرام کے تحت ضلع پلوامہ کے راجپورہ کے سپورٹس سٹیڈیم میں ٹی 20 کرکٹ ٹورنامنٹ کا انعقاد کیا جس کا مقصد نوجوانوں کو کھیل کود کی سرگرمیوں سے منسلک کرنا اور منشیات سے دور رکھنا ہے۔
اس ٹورنامنٹ کا افتتاح ڈی ائی جی جنوبی کشمیر رئیس محمد بٹ نے ایس ایس پی پلوامہ محمد یوسف کے ہمراہ کیا جس میں علاقے کی 16 ٹیمیں شرکت کر رہی ہیں۔ اس موقع پر نوجوانوں نے بات کرتے ہوئے پلوامہ پولیس خاص کر ایس ایس پی پلوامہ محمد یوسف کا شکریہ ادا کیا اور کہا کہ پولیس کی جانب یہ ٹورنامنٹ کے انعقاد سے یہاں کے نوجوانوں کو اپنی صلاحیتوں کو نکھارنے میں مدد ملے گی۔
انہوں نے کہا کہ اس وقت نوجوانوں منشیات کا استعمال کرنے لگے ہے جبکہ پولیس ان نوجوانوں کو منشیات سے دور رکھنے کے لئے اقدامات اٹھارہی ہے جو ایک اچھی پہل ہے۔ اس موقع پر ڈی ائی جی جنوبی کشمیر رئیس محمد بٹ نے بات کرتے ہوئے کہا کہ پولیس کی جانب سے ہر سال ایک اسپورٹس ٹورنامنٹ کا انعقاد کیا جاتا ہے۔ انہوں نے کہاکہ ہر ضلع میں کھیل کود کے مقابلے منعقد کئے جائیں گے۔ انہوں نے پلوامہ پولیس سے کہا کہ وہ نوجوانوں کو کھیل کود کے لئے سبھی سہولیات فراہم کرنے کی کوشش کریں۔
یہ بھی پڑھیں: Yakja Hotel Chain Owner Kashmiri Businessman : ’شعبہ سیاحت میں روزگار کے کافی وسائل موجود‘
انہوں نے پولیس کو ہدایت دی کہ وہ اسپورٹس کونسل اور مقامی لوگوں کے ساتھ مل کر نوجوانوں کو کھیلنے کے لئے سہولتیں فراہم کریں تاکہ مقامی نوجوان مختلف کھیلوں کی سرگرمیوں سے منسلک ہوں۔ انہوں نے عوام سے اپیل کی کہ وہ بھی منشیات کے استعمال کی روک تھام کے لئے سامنے آئے اور جموں وکشمیر کو منشیات سے پاک کرنے میں مدد کرے۔ اس موقع پر ضلع پلوامہ پولیس کے دیگر افسران بھی موجود تھے۔
