پلوامہ پولیس نے منشیات کے خلاف کارروائی جاری رکھتے ہوئے مختلف مقامات سے منشیات ضبط کرکے منشیات فروشوں کو حراست میں لے لیا۔
پولیس نے ضلع کے ارہل کراسنگ کے قریب ایک گاڑی کی تلاشی کے دوران 22کلو پوست اور 600 گرام چرس بر آمد کرکے گاڑی میں سوار تین افراد کو حراست میں لے لیا۔
پلوامہ پولیس نے گرفتار کیے گئے افراد کی شناخت محمد یوسف زئی ساکنہ شادپورہ، ٹہاب محمد افضل بٹ اور مشتاق احمد بھٹ ساکنان ڈانگرپورہ، ارہل کے طور پر کی ہے۔
پولیس نے تینوں کو حراست میں لیکر NDPS ایکٹ کے ایف آئی آر نمبر 210/21 درج کرکے مزید تفتیش شروع کر دی۔
وہیں پلوامہ پولیس نے ایک مخصوص اطلاع پر راتھر محلہ، ارہل میں ارشد احمد راتھر کے مکان پر چھاپہ مارا اور زیر زمین چھپائے گئے 23 کلوگرام پوست کو ضبط کر لیا۔
پولیس نے اس ضمن میں ایف آئی آر 213/2021 درج کرکے مزید کارروائی شروع کر دی۔
ادھر پولیس کو منشیات سے متعلق ایک اور خبر موصول ہوئی جس کے بعد پلوامہ پولیس نے گڈورہ علاقے میں محمد یوسف خان کے رہائشی مکان پر چھاپ مار کر 274 کلوگرام پوست ضبط کر لیا۔
مزید پڑھیں: اننت ناگ میں منشیات فروش گرفتار
اس معاملے میں بھی پلوامہ پولیس نے ایف آئی آر نمبر 216/2021 درج کرکے مزید تفتیش شروع کر دی۔
منشیات فروشوں کے خلاف پولیس کی کارروائی کی عوامی حلقوں میں کافی سراہنا کی جا رہی ہے، وہیں پولیس نے منشیات کا قلع قمع کرنے میں عوام سے تعاون کی اپیل کی ہے۔
