پلوامہ (جموں و کشمیر): محکمہ وایلڈ لائف کے اہلکاروں نے ضلع پلوامہ کے ترال علاقے میں ایک سانپ کو ریسکیو کر لیا ہے۔ اطلاعات کے مطابق ترال ٹاؤن سے نزدیک ہی درمبل گاؤں میں ایک سانپ نمودار ہوگیا، جس کی وجہ سے اہل محلہ خوفزدہ ہو گئے اور انہوں نے فوری طور محکمہ وائلڈ لائف اہلکاروں کو فون پر مطلع کیا۔ محکمہ وائلڈ لائف نے بروقت پہنچ کر سانپ کو ریسکیو کر لیا اور بعد ازاں اسے جنگل میں چھوڑ دیا۔ مقامی باشندوں نے وائلڈ لائف اہلکاروں کی جانب سے کی گئی بروقت کارروائی پر محکمہ کے اہلکاروں کی ستائش کی۔
جموں و کشمیر محکمہ وائلڈ لائف کے ایک اہلکار، مظفر احمد، ای ٹی وی بھارت کے ساتھ بات کرتے ہوئے کہا کہ ’’گرمی بڑھتے ہی دھوپ سیکنے کے لیے سانپ (اپنی بلوں سے) باہر نکلتے ہیں اور انہیں ہرگز چھیڑنا نہیں چاہیے بلکہ وائلڈ لائف اہلکاروں کو مطلع کرنا چاہئے تاکہ کسی شخص حتی کہ جانور کو نقصان پہنچے بغیر ہی سانپ یا کسی بھی جنگلی جانور کو ریسکیو کیا جائے۔‘‘
مزید پڑھیں: Wildlife Department Caught Bear محکمہ وئلڈ لائف نے ریچھ کو پکڑلیا
انہوں نے مزید کہا کہ ’’گرمی کے ایام میں سانپ کا بلوں سے باہر نکلنا ایک قدرتی امر ہے اور اس میں ڈرنے یا خوفزدہ ہونے کی کوئی بات نہیں تاہم وائلڈ لائف کو فوری طور مطلع کیا جانا چاہئے۔‘‘ انہوں نے عوام سے اپیل کی ہے کہ ترال علاقے میں محکمہ کی جانب سے ایک کنٹرول روم قائم کیا گیا ہے جو چوبیس گھنٹے کھلا رہتا ہے۔ محکمہ کے اہلکاروں نے عوام سے سانپ، ریچھ تیندوا یا کوئی اور جانور انسانی بستیوں کے قریب نظر آنے کی صورت میں فوری طور محکمہ کے ساتھ رابطہ قائم کرنے کی اپیل کی ہے تاکہ فوری طور ریسکیو عمل شروع کیا جا سکے۔ واضح رہے کہ وادی کشمیر میں زیادہ زہریلے سانپ نہیں ہوتے تاہم سانپ نظر آتے ہی لوگوں کا ڈر جانا ایک فطری عمل ہے اور اس حوالے سے گرمی کے ان ایام میں لوگوں کو احتیاط سے کام لینا چاہئے۔
