ای ٹی وی بھارت اردو کی خبر کو نشر ہوئے ابھی چند ہی دن ہی ہوئے تھے کہ زِزبل لام گاؤں میں سڑک کی تعمیراتی کام کو دوبارہ شروع کیا گیا اور جمعہ کے روز تعمیراتی کام مکمل کرلیا گیا۔ تعمیراتی کام مکمل ہونے پر مقامی لوگوں نے راحت کی سانس لی اور خوشی کا اظہار کیا۔
واضح رہے کہ زِزبل لام گاؤں ترال علاقے کا سب سے آخری گاؤں ہے اور سطح سمندر سے کافی اونچائی پر واقع ہے لیکن آزادی کے بعد سے اب تک یہ گاؤں گویا حکومت اور انتظامیہ کی عدم توجہی کا شکار ہے۔
اس گاؤں میں ہیلتھ سینٹر اور پینے کے پانی کی باقاعدہ سہولیات نہ ہونے سے لوگوں کو کافی مشکلات کا سامنا ہے نیز صاف پینے کا پانی حاصل کرنے کے لیے بھی لوگوں کو دقتوں کا سامنا کرنا پڑتا ہے۔
ترال سب ضلع کا ززبل لام گاؤں میں سڑک کی تعمیراتی کام مکمل ہونے سے اب یہ گاؤں باقی دنیا کے ساتھ جڑ گیا ہے۔ سڑک کی تعمیراتی کام پر مقامی لوگوں نے خوشی کا اظہار کیا۔ مقامی لوگوں کا کہنا ہے کہ مذکورہ سڑک کی تعمیر کے بعد اب یہاں سیاحت کو بھی فروغ ملے گا۔'
غور طلب ہے کہ اس سڑک کو پردھان منتری گرام سڑک یوجنا (پی ایم جی ایس وائی) تعمیراتی ایجینسی نے قریباً پونے دو کروڑ روپے کی مالیت سے تعمیر کی ہے۔'
- مزید پڑھیں: پلوامہ: زِزبل لام حکومت کی عدمِ توجہی کا شکار
مقامی باشندہ بشیر احمد گوجر نے ای ٹی وی بھارت کو بتایا کہ آزادی سے آج تک اس علاقے میں رابطہ کی سہولیات دستیاب نہیں تھی لیکن آج پورے گاؤں کے لیے خوشی کا دن ہے کہ ان کا گاؤں باقی دنیا کے ساتھ جڑ گیا ہے، کیونکہ سڑک کی خستہ حالی کی وجہ سے گاؤں والون کو گونا گوں مشکلات کا سامنا تھا، تاہم آج اس نئی سڑک کی تعمیر سے گاؤں کا نقشہ بدل گیا ہے'۔
ایک دیگر مقامی باشندہ غلام قادر نے بتایاکہ آج ہمارے گاؤں کے لیے گویا عید ہے اور ہمارا خواب شرمندہ تعبیر ہوا ہے، کیونکہ آج تک اس گاؤں میں رابطہ سہولیات دستیاب نہیں ہونے سے مقامی آبادی قدیم طرز سے زندگی گزارنے پر مجبور تھی اور اب انہیں امید ہے کہ مقامی سیاحت کو بھی فروغ ملے گا'۔
اسسٹنٹ ایگزیکٹو انجینئر پی ایم جی ایس وائی شبیر احمد ٹاک نے بتایا کہ محکمے نے 1.69 کروڈ کیہ مالیت سے یہ پروجیکٹ مکمّل ہوا ہے اور اس سڑک کی تعمیر سے پورے علاقے میں ترقی کو ایک نئی پرواز ملے گی۔
