پونچھ: سرحدی ضلع پونچھ میں تحصیل منڈی کے اڑائی ملکاں مڈل سکول 15 اگست یوم آزادی کے موقع پر مبینہ طور منتخب عوامی نمائندے کو نظر انداز کر کے ایک مقامی شخص کی جانب سے جھنڈ لہرائے جانے پر مقامی سرپنچ نے محکمہ تعلیم کے تئیں سخت ناراضگی کا اظہار کیا ہے۔ وہیں اس ضمن میں زونل ایجوکیشن آفیسر نے اسکول انتظامیہ سے اس کی وضاحت طلب کی ہے۔ Poonch School Flag Controversy
سرپنچ حلقہ اڑائی ملکاں محمد اسلم ملک نے پی آر آئی ممبران کو نظر انداز کر کے غیر مجاز شخص کے ترنگا لہرانے کے عمل کو غیر اخلاقی، غیر قانونی اور پی آر آئی ممبران کی تذلیل سے تعبیر کیا۔ انہوں نے کہا کہ ’’پی آر آئی ممبران نے سبھی پنچ، سرپنچ صاحبان کو ترنگا لہرائے جانے پر مامور کیا تھا تاہم مڈل اسکول انتظامیہ نے اصول و ضوابط اور سرکاری حکمنامہ کو بالائے طاق رکھ کر ترنگے کی بے حرمتی کی ہے۔‘‘ ایک اور پنچ محمد حفیظ نے بھی سکول انتظامیہ پر الزام ٹھہراتے ہوئے ان کے خلاف سخت کارروائی کی مانگ کی ہے۔ Poonch Tricolour Controversy
زونل ایجوکیشن آفیسر منڈی نے کہا کہ انہوں نے وائرل ویڈیو کے بعد فوری طور اسکول کے ہیڈ ماسٹر سے وضاحت طلب کی ہے۔ زونل ایجوکیشن آفیسر نے کہا کہ انہوں نے فوری طور وجہ بتاؤ نوٹس جاری کرتے ہوئے ہیڈ ماسٹر سے وضاحت طلب کی ہے۔ انہوں نے کہا کہ سرکاری حکمنامہ کے مطابق علاقے کا مقامی پی آر آئی ممبر ہی پرچم کشائی کا حق رکھتا ہے، پنچ یا سرپنچ کی عدم موجودگی کے وقت ہیڈ ماسٹر یا اسکول پرنسپل کو ہی ترنگا لہرانا ہوگا۔
