مالیگاؤں: مہاراشٹر کے شہر مالیگاؤں میں 'شہر تعزیہ کمیٹی' کی جانب سے ایک پریس کانفرنس اردو میڈیا سینٹر پر منعقد کی گئی، جس میں میں تعزیہ کمیٹی کے ذمہ دار شفیق رانا نے محرم کی تیاریاں اور تعزیہ گھر کی تعمیر سے متعلق تبادلہ خیال کیا۔ Malegaon Taziya committee
اس موقع پر تعزیہ کمیٹی کے ذمہ دار شفیق رانا نے سنی تعزیہ کمیٹی پر الزام عائد کرتے ہوئے کہا کہ تعزیہ گھر کی منظوری کو سنی تعزیہ کمیٹی کے اعتراض کے سبب نا منظور کردیا گیا۔ انہوں نے بتایا کہ اس تعلق سے وہ مسلسل جدوجہد کررہے ہیں تاکہ کسی طرح قانون کے دائرے میں اس کام کو منظوری مل جائے۔
شفیق رانا نے مزید کہا کہ گزشتہ روز شہر تعزیہ کمیٹی کی جانب سے ایڈیشنل ایس پی کو ایک مطالباتی مکتوب روانہ کیا گیا، جس میں پولیس انتظامیہ سے مطالبہ کیا گیا ہے کہ 12 نومبر تشدد معاملہ میں فرار ملزم جاوید انور کو فوراً گرفتار کیا جائے، وہ اس لئے کیونکہ انہوں نے تعزیہ گھر کی منظوری میں رکاوٹ ڈالی ہے اور محرم کے موقع پر اپنے مفادات کیلئے وہ شہر میں کوئی نا خوشگوار واقعہ پیدا نہ کرے اس لئے انہیں گرفتار کیا جائے۔
