پونے: پاکستانی ایجنٹ کو خفیہ معلومات فراہم کرنے کے الزام میں گرفتار ڈیفنس ریسرچ ڈیولپمنٹ آرگنائزیشن (ڈی آر ڈی او)کے سائنسداں پردیپ کورولکر کی پولیس حراست میں 16 مئی تک توسیع کر دی گئی ہے۔ پونے کی خصوصی عدالت نے پیر کو یہ حکم دیا ہے۔ اس کے ساتھ ہی عدالت میں ایک اور معاملہ سامنے آیا ہے۔ جس میں بنگلور سے 'ایئر فورس' افسر نکھل شندے کو بھی اسی پاکستانی 'آئی پی ایڈریس' سے 'کال' موصول ہوا۔ دلچسپ بات یہ ہے کہ کرولکر کو بھی اسی نمبر سے کال آیا تھا۔ اس معاملے میں نکھل شندے سے بھی پوچھ گچھ کی گئی۔ فضائیہ کی انکوائری کمیٹی بھی ان کی تحقیقات کر رہی ہے۔
کورولکر کی حراست میں توسیع کا مطالبہ کرتے ہوئے استغاثہ نے کہا کہ ان کے موبائل فون کا تجزیہ کرنے کی ضرورت ہے۔ استغاثہ نے جج کو بتایا کہ 'پولیس کو ملزمین کی مدد سے موبائل فون کھولنا پڑا کیونکہ وہ خود ایسا نہیں کر سکتے تھے'۔ وکیل نے دلائل دیتے ہوئے کہا کہ موبائل فون پہلے ہی قبضے میں لیا جا چکا ہے تاہم کوئی نئی اطلاع نہیں ملی ہے۔ یاد رہے کہ پونے میں ڈیفنس ریسرچ ڈیولپمنٹ آرگنائزیشن (ڈی آر ڈی او) کی لیبارٹری کے ڈائریکٹر کورولکر کو 3 مئی کو مہاراشٹر پولیس کے انسداد دہشت گردی اسکواڈ (اے ٹی ایس) نے گرفتار کیا تھا۔
اے ٹی ایس کے ایک اہلکار نے گزشتہ ہفتے کہا تھا کہ سائنسداں مبینہ طور پر واٹس ایپ اور ویڈیو کالز کے ذریعے پاکستان کے انٹیلی جنس آپریٹو کے ایک ایجنٹ سے رابطے میں ہیں، یہ ہنی ٹریپ کا معاملہ ہے۔ ان کی گرفتاری کے بعد، کورولکر کے خلاف سرکاری راز ایکٹ کی متعلقہ دفعات کے تحت مقدمہ درج کیا گیا تھا۔استغاثہ نے عدالت کو مطلع کیا تھا کہ انہوں نے ایک فون ضبط کیا ہے جس پر پی آئی او (پرسن آف انڈین اوریجن) ایجنٹ نے انڈین نمبر کا استعمال کرتے ہوئے ملزمین کو میسیج بھیجے تھے۔ کورولکر نے مبینہ طور پر سفارتی پاسپورٹ پر پانچ سے چھ ممالک کا سفر کیا تھا اور استغاثہ جاننا چاہتا تھا کہ ان دوروں کے دوران وہ کس سے ملے تھے۔
یہ بھی پڑھیں : DRDO Scientist Arrested ڈی آر ڈی او کے ڈائریکٹر پاکستان کو معلومات فراہم کرنے کے الزام میں گرفتار
