Sisters Achieved Success In The Neet:جڑواں بہنوں نے نیٹ میں کامیابی حاصل کی

جموں وکشمیر کے ضلع کولگام کے جڑواں بہنوں نے نیٹ کے امتحان میں پہلی کوشش میں کامیابی حاصل کرکے ماں باپ کے ساتھ ساتھ اپنے ضلع کا نام بھی روشن کیا۔

جنوبی کشمیر کے کولگام ضلع کے دمحال ہانجی پورہ سے تعلق رکھنے والے ایک امام کی جڑواں بیٹیوں نے اپنی پہلی کوشش میں انڈر گریجویٹ قومی اہلیت کم داخلہ ٹیسٹ 2023 میں کامیابی حاصل کی۔کولگام ضلع کے وٹو گاؤں سے تعلق رکھنے والی سابیہ اور سید بسماہ نے امتحان میں بالترتیب 625 اور 570 نمبر حاصل کیے ہیں۔

لڑکیوں نے بتایا کہ والدین نے ہمیں بچپن سے ہی وہ سب کچھ فراہم جو پڑھنے کیلئے ضروری تھا۔ انہوں نے ہمارے مستقبل کے لیے ایک بہت بڑی قربانی دی ہے۔ لڑکیوں نے کہا کہ NEET امتحان میں کامیاب ہونے کے لیے توجہ مرکوز کرنے کی ضرورت ہوتی ہے۔"اگر آپ NEET میں شامل ہونا چاہتے ہیں، تو آپ کو پہلے اپنا لیول چیک کرنا چاہیے اور اپنی کمزوریوں کی نشاندہی کرنی چاہیے۔آپ کو اپنی کمزوریوں کے بارے میں اپنے اساتذہ سے بات کرنی چاہیے اور ان پر عبور حاصل کرنے کے لیے انٹرنیٹ سے بھی مدد لینا چاہیے۔

ان کے والد نے کہا کہ انہوں نے اپنی بیٹیوں کی کفالت کے لیے بہت جدوجہد اور محنت کی ہے۔میرا ہر والدین کو مشورہ ہے کہ آپ اپنے بچوں کو ان کے بہتر مستقبل کے لیے بہترین مواقع فراہم کریں۔ انہوں نے مزیدکہا کہ انسان محنت کرے تو کچھ بھی ہوسکتا ہے، حوصلہ انسان کو کامیاب بناتا ہے۔