جموں: شری امرناتھ جی یاترا کے لئے جموں کے بھگوتی نگر بیس کیمپ سے یاتریوں کا کشمیر کی طرف روانہ ہونے کا سلسلہ جوش و خروش سے جاری ہے۔ سرکاری ذرائع کے مطابق اتوار کی صبح بھگوتی نگر بیس کیمپ سے 6 ہزار 6 سو یاتریوں پر مشتمل 14 واں جھتا کشمیر کے لئے روانہ ہوا۔ انہوں نے بتایا کہ یاتریوں کا یہ جھتا 241 چھوٹی بڑی گاڑیوں میں سخت سیکورٹی بندوبست کے بیچ بالہ تل اور ننون پہلگام بیس کیمپوں کے لئے روانہ ہوا۔ ذرائع نے بتایا کہ ان یاتریوں میں سے بالہ تل بیس کیمپ کے لئے 2 ہزار 9 سو 98 یاتری روانہ ہوئے جبکہ ننون پہلگام بیس کیمپ کے لئے 3 ہزار 686 یاتری روانہ ہوگئے۔
یکم جولائی سے شروع ہونے والی اس یاترا کے دوران اب تک زائد از2 لاکھ یاتریوں نے پوتر گھپا کا درشن کیا ہے۔ 62 دنوں پر محیط یہ سالانہ یاترا 31 اگست کو شرون پورنیما کے متبرک موقع پر اختتام پذیر ہوگی۔ حکام نے یاتریوں کی سہولیت کے لئے دونوں راستوں پر ہیلی کاپٹر سروس بھی دستیاب رکھی ہے۔ یاتریوں کے صحت کو پیش نظر رکھتے ہوئے جنک فوڈ پر پابندی عائد کی گئی ہے اور راستے میں ہی لنگروں کا بھر پور انتظام کیا گیا ہے۔ جموں وکشمیر انتظامیہ اور شری امرناتھ شرائن بورڈ نے امسال بھی یاترا کے لئے فقید المثال انتطامات کئے ہیں۔ دریں اثنا ملک کے مختلف حصوں سے آنے والے یاتریوں میں یاترا کے تئیں انتہائی جوش و خروش دیکھا جا رہا ہے۔ یاتری حکومت اور شرائن بورڈ کی طرف سے کئے گئے انتظامات پر بھی خوش اور مطمئن ہیں۔
یہ بھی پڑھیں: Amarnath Yatra 2023 امرناتھ یاتریوں کا 13 واں جتھا جموں سے کشمیر روانہ
یو این آئی
