بھارتی فضائیہ کے چیف مارشل سرینگر میں، قیاس آرائیوں کا دور جاری

ریاست جموں و کشمیر میں گذشتہ ایک ہفتے سے افواہوں کا بازار گرم ہے اور انتظامیہ کی طرف سے بھی ہر روز نئے نئے احکامات جاری کیے جارہے ہیں جس سے عوام کی خدشات میں اضافہ ہورہا ہے۔

ریاست کی صورتحال کو لے کر کافی قیاس آرائیاں لگائی جا رہی ہیں اور انتظامیہ کے ہر قدم پر وادی کی عوام اپنی آنکھیں ٹکائے ہوئے ہیں۔

ایسے میں سرینگر ایئرپورٹ پر بھارتی فضائیہ کے چیف مارشل بی ایس دھنوا کا دیکھا جانا وادی کشمیر کی عوام میں مزید قیاس آرائیاں اور خدشات کو جنم دیتا ہے۔

وہیں بھارتی فضائیہ کے ایک اعلی اہلکار کے مطابق "ایئر چیف مارشل کشمیر میں ہورہی حفاظتی دستوں کی تعیناتی کا خود جائزہ لے رہے ہیں۔ اسی سلسلے میں انہوں نے آج وادی کے اعلی عہدے داروں سے ملاقات کی اور اب کچھ ہی دیر میں واپس دہلی کے لیے روانہ ہوں گے۔"

سکیورٹی ایجنسیز کے ذرائع کے مطابق وادی کشمیر میں گزشتہ ایک ہفتے میں ایک لاکھ سے زائد نیم فوجی دستوں کی تعیناتی مکمل ہوچکی ہے۔