پیپلز ڈیموکریٹک فرنٹ کے چیئرمین حکیم یاسین نے الزام عائد کیا ہے کہ ڈی ڈی سی اور پنچایتی انتخابات میں حصہ لے رہے امیدواروں کو حکومت کی طرف سے معقول سکیورٹی فراہم نہیں کی جارہی ہے۔
حکیم یاسین کا کہنا ہے کہ 'امیدواروں کو سکیورٹی فراہم نہ کرنے کی وجہ سے وہ نہ تو اپنے متعلقہ علاقوں میں انتخابی مہم چلا پاتے ہیں اور نہ ہی وہ اپنے علاقوں کے لوگوں سے ووٹ مانگنے کے لیے جا پاتے ہیں۔'
انہوں نے کہا کہ اکثر امیدواروں کی شکایت ہے کہ انہیں سکیورٹی فراہم کرنے کے بہانے ہوٹلوں یا سکیورٹی حصار میں بند رکھا جاتا ہے۔
پی ڈی ایف کے چیئرمین نے ریاستی انتخابی کمشنر پر زور دیا ہے کہ وہ امیدواروں کو متعلقہ علاقوں میں بلا رکاوٹ اپنی انتخابی مہم چلانے کے لئے معقول حفاظت کے بندوبست کریں اور اس ضمن میں حائل رکاٹوں اور مشکلات کو فوری دور کریں۔
انہوں نے جموں و کشمیر میں جاری ڈی ڈی سی انتخابات اور پنچایتی انتخابات کو منصفانہ، غیر جانبدارانہ اور شفاف طریقے سے عمل میں لانے کی ضرورت پر بھی زور دیا تا کہ جمہوریت اور چناؤ عمل پر لوگوں میں اعتماد اور بھروسے کو بحال کیا جائے۔
حکیم یاسین نے لوگوں سے اپیل کی کہ وہ فرقہ پرست طاقتوں کو دور رکھنے کے لئے اپنے ووٹ کا صحیح استعمال کریں اور دیانت دار امیدواروں کے حق میں ہی اپنا قیمتی ووٹ ڈالیں۔
