دراصل گجرات ہائی کورٹ نے گذشتہ دنوں کورونا وائرس کے پیش نظر لوگوں کو مذہبی مقامات پر نہ جانے کی ہدایت دی تھی جس کے بعد تمام مذاہب کے رہنماؤں نے مساجد، درگاہ و مذہبی مقامات یا مندروں میں لوگوں کے نہ جانے کا فیصلہ کیا۔
جس کے سبب سوراشٹر میں سومناتھ مندر کو اور دوارکا دھیش کے مندر کو درشن کے لیے بند کردیا گیا ہے اور دوسری جانب مسلم برادری نے تمام لوگوں سے گھر میں نماز ادا کرنے کی اپیل کی ہے۔
اس تعلق سے آثار قدیمہ نے بھی گجرات کی تاریِخی مساجد کے دروازے بند کرادیے۔
ایسے میں احمد آباد کی تاریخی شاہ عالم درگاہ کے خادم صوبہ خان پٹھان نے کہا کہ بلا وجہ گھر سے باہر گھومنے والے لوگوں سے اپیل ہے کہ وہ اپنے گھر پر ہی رہیں اور بیماری سے بچنے کے لیے دعا کریں۔
انھوں نے مزید کہا کہ وزیر اعظم مودی نے قوم سے خطاب میں جو کہا ہے اس پر عمل درآمد کرنا بہت ضروری ہے۔ ان تمام اقدامات کو مل کر قوم کو بچانے کے لیے اٹھائے جانے کی ضرورت ہے اور کورونا وائرس سے بچنے کے لئے ہر ممکن قدم اٹھائے جانے کی بھی اشد ضرورت ہے۔
واضح رہے کہ احمدآباد کے شاہ عالم درگاہ میں ہر روز عقیدت مندوں کا ہجوم نظر آتا تھا لیکن اب کورونا وائرس کے خوف کے سبب درگاہ میں پوری طرح سناٹا پسرا ہوا ہے۔
گجرات اسٹیٹ کنٹرول روم نے ایک لسٹ جاری کی گئی ہے۔ جس میں بتایا گیا ہے کہ اب تک گجرات میں 38 مثبت کیس ہوچکے ہیں اور کورونا وائرس سے ایک 67 سالہ شخص کی موت بھی ہوچکی ہے۔
احمدآباد میں 14سورت میں 7 راجکوٹ میں 3 وڈودرا میں 7 گاندھی نگر میں 6، کَچھ میں 1 معاملے درج کیے گئے ہیں۔
اب تک احمدآباد میں سب سے زیادہ 14 پوزیٹیو کیس سامنے آئے ہیں اور اب باہر نکلنے والوں پر بھی پولیس سختی سے کاروائی کر رہی ہے۔
