مرکز کے زیر انتظام جموں و کشمیر کے ڈوڈہ میں محکمۂ یوتھ سروسز اینڈ اسپورٹس کے زیر اہتمام سٹی مڈل اسکول میں زونل سطح کے باسکٹ بال ٹورنامنٹ کا آغاز کیا گیا۔ ضلع میں پہلی مرتبہ لڑکیوں اور لڑکوں کے لئے انڈر 14، 17 اور 19 باسکٹ بال ٹورنامنٹ کا افتتاح ڈسٹرکٹ یوتھ سروسز اینڈ اسپورٹس آفیسر جعفر حیدر شیخ نے کیا۔
اس موقع پر ڈوڈہ کے مختلف تعلیمی زون کے افسران کے علاوہ چھ ٹیموں کے کھلاڑی بھی موجود رہے۔ ضلع میں باسکٹ بال کے محدود وسائل اور گراؤنڈ کی عدم دستیابی کی وجہ سے صرف زون گندنہ اور ڈوڈہ کی چھ ٹیموں کو منعقدہ ایونٹ میں شرکت کی اجازت دی گئی ہے۔
افتتاحی تقریب کے موقع پر اسپورٹس آفیسر نے بتایا کہ ڈوڈہ کی تاریخ کے لئے یہ ایک یاد گار لمحہ ہے، جب سرکاری سطح پر باسکٹ بال ٹورنامنٹ کا انعقاد کیا جارہا ہے۔
اُنہوں نے بتایا کہ اس ٹورنامنٹ میں کُل چھ ٹیمیں شرکت کررہی ہیں اور امید ہے کہ اگلے برس بھدرواہ اور گندو سے بھی ٹیمیں شرکت کریں گی کیونکہ ضلع میں ابھی اس کھیل کے لئے معقول بنیادی ڈھانچہ موجود نہیں ہے۔
جعفر حیدر شیخ نے کھلاڑیوں کو مشورہ دیا کہ وہ اِس موقع کا بھرپور فائدہ اُٹھاکر اپنی صلاحیتوں کا مظاہرہ کریں۔
یہ بھی پڑھیں: سرینگر: یہ بچے بھی کسی سے کم نہیں
اُنہوں نے کھلاڑیوں کو بتایا کہ وہ زون سطح پر اچھی کاکردگی کا مظاہرہ کریں۔ ٹورنامنٹ میں کھلاڑیوں کی صلاحیتوں کو مدنظر رکھتے ہوئے آگے بڑھنے کا موقع بھی دیا جائے گا۔
