محمد آصف کا تقریباً دو ماہ قبل سردرد کی شکایت کے بعد دہلی کے ایک معروف ہسپتال میں آپریشن کیا گیا لیکن آپریشن کامیاب نہیں ہوسکا اور سر کے اندر مواد جمتا گیا جس کی وجہ سے وہ مختلف ہپستالوں کے چکر لگاتے رہے آخر کار آخری ایام انہوں نے ابوالفضل میں واقع الشفا ہسپتال میں گزارے اور دس اپریل کی صبح خالق حقیقی سے جاملے۔
بدھیشری رام پور ارریہ بہار کے رہنے والے محمد آصف نے اپنے صحافتی کیریئر کا آغاز اردو کی معروف نیوز ایجنسی یو این آئی سے کیا، یہاں دس سال تک خدمات انجام دینے کے بعد اردو اخبارات سے منسلک ہوگئے، اس کے بعد وہ ’سب کا اخبار’ اور پھر روز نامہ راشٹریہ سہارا اردو سے منسلک ہوگئے۔ اپنی محنت، لگن اور دلچسپی سے اس اخبار کوقارئین کی زینت بنانے میں اہم رول ادا کیا اور یہاں تقریباً دس سال کام کیے ۔
اخبارات کو چھوڑنے کے بعد محمد آصف ’چینج مشن انڈیا’ کے ساتھ جڑ گئے اور اپنے سماجی سوجھ بوجھ کی وجہ سے لوگوں کے لیے ہر ممکن مدد کرنے کے لیے تیار رہنے لگے۔ اسی دوران گزشتہ سال لاک ڈاؤن کے دوران مذکورہ این جی او کے ذریعہ سیکڑوں پریشان حال مزدور اور پھنسے ہوئے لوگوں کو گھرتک پہنچایا۔ان کی اس مدد کے لیے بہار اور یوپی کے لوگ تعریف کرتے نہیں تھکتے۔
مرحوم کے چھوٹے بھائی گڈو نے بتایا کہ محمد آصف نے اپنے پیچھے ایک بیٹا اور ایک بیٹی اور بیوی کو چھوڑا ہے۔ ان کی تدفین بٹلہ ہاؤس قبرستان میں سیکڑوں سوگواروں کی موجودگی میں عمل میں آئی۔ محمد آصف کے انتقال سے اردو صحافیوں میں غم کی لہر ہے۔
واضح رہے کہ اس سے قبل نوجوان صحافی مولانا عبدالقادر شمس کا انتقال ہوگیا تھا جس سے ابھی صحافی برادری غم سے نکل بھی نہیں پائے تھے کہ اب ایک اور صحافی محمد آصف کا انتقال ہوگیا۔
