نئی دہلی: پارلیمنٹ کے مانسون اجلاس میں آج ہنگامہ آرائی کے درمیان لوک سبھا کی کارروائی بار بار ملتوی کرنی پڑی۔ لوک سبھا کی کارروائی ایک بار پھر دوپہر 2 بجے سے شروع ہوئی۔ اس دوران ایوان میں ارکان پارلیمنٹ کی معطلی منسوخ کرنے کی قرارداد منظور کی گئی۔ Parliament Monsoon Session
لوک سبھا اسپیکر اوم برلا نے تمام اراکین کو کہا کہ وہ ایوان میں پلے کارڈ لے کر نہ آئیں۔ انہوں نے کہا کہ میں ایوان میں موجود تمام جماعتوں سے درخواست کروں گا کہ وہ پلے کارڈز ایوان کے اندر نہ لائیں۔ اگر اراکین پارلیمنٹ کبھی پلے کارڈز لے کر آئے تو میں نہ حکومت اور نہ ہی اپوزیشن کی بات سنوں گا بلکہ ضروری کارروائی کروں گا۔ اوم برلا نے کہا کہ میں انہیں آخری موقع دے رہا ہوں۔ اس کے بعد لوک سبھا میں ممبران پارلیمنٹ کی معطلی منسوخ کرنے کی قرارداد منظور کی گئی۔ ارکان اسمبلی کی معطلی منسوخ کر دی گئی جس کے بعد لوک سبھا میں تعطل بھی ختم ہوگیا۔ اب ایوان میں مہنگائی پر بحث شروع ہوگئی ہے۔
پارلیمنٹ کے مانسون اجلاس میں آج صبح دونوں ایوانوں میں ہنگامہ ہوا جس کی وجہ سے راجیہ سبھا کی کارروائی دوپہر 12 بجے تک اور لوک سبھا کی کارروائی دوپہر 2 بجے تک ملتوی کر دی گئی۔ اب چونکہ لوک سبھا کی کارروئی دوبارہ شروع ہوئی ہے تو اس دوران شیوسینا کی جانب سے سنجے راوت کی گرفتاری کا معاملہ بھی اٹھایا جا سکتا ہے۔
