نئی دہلی: کانگریس لیڈر راہل گاندھی کی لوک سبھا کی رکنیت کی منسوخی اور گھر خالی کرنے کے نوٹس کے بعد کانگریس کی ایک خاتون کارکن نے اپنا گھر راہل گاندھی کے نام کر دیا ہے۔ منگول پوری کی رہائشی راج کماری گپتا نے اپنا 4 منزلہ مکان راہل گاندھی کے نام پر کر دیا ہے۔ راج کماری گپتا نے گھر کے تمام کاغذات پر راہل گاندھی کا نام لکھوا دیا ہے۔ وہ کہتی ہیں کہ وہ جس کالونی میں رہتی ہیں وہ اندرا گاندھی کے دور میں آباد ہوئی تھی۔ منگولپوری کی رہنے والی راج کماری گپتا گزشتہ 15 سالوں سے کانگریس سے وابستہ ہیں اور مسلسل کانگریس پارٹی کے لیے کام کر رہی ہیں۔ راج کماری گپتا کا کہنا ہے کہ راہل گاندھی کے ساتھ پچھلے کچھ دنوں میں پیش آنے والے واقعات سے انہیں بہت دکھ ہے۔
یہ بھی پڑھیں: Rahul Gandhi disqualification راہل کا معاملہ اب پورے ملک میں گونجے گا، پرینکا گاندھی کا بیان
انہوں نے کہا کہ وہ راہل گاندھی کو اپنا بھائی مانتی ہیں اور بہن ہونے کا فرض پورا کرتے ہوئے انہوں نے اپنا گھر راہل گاندھی کے نام کر دیا ہے۔ راج کماری گپتا کا کہنا ہے کہ یہ کالونی راہل گاندھی کی دادی اندرا گاندھی نے آباد کی تھی اور یہ گھر بھی انہیں کا دیا ہوا ہے۔ آج وہ اندرا گاندھی کی طرف سے دیا گیا گھر ان کے پوتے راہل گاندھی کے نام کر رہی ہیں۔ راج کماری گپتا نے کہا کہ بی جے پی نے راہل گاندھی کے ساتھ جو سلوک کیا اس کی وجہ سے وہ کئی راتوں تک سو نہیں پائی تھیں۔ اب جب انہیں سرکاری گھر خالی کرنے کا نوٹس دیا گیا ہے تو وہ اپنا گھر راہل گاندھی کے نام پر کرکے اپنی بہن ہونے کا فرض پورا کر رہی ہیں۔ واضح رہے کہ راج کماری گپتا دہلی کانگریس سیوا دل کی ریاستی صدر ہیں۔
