تبلیغی جماعت معاملے میں دہلی پولیس کی کرائم برانچ نے ساکیت عدالت میں چارج شیٹ داخل کر دی ہے۔ چارج شیٹ میں 20 ممالک سے تعلق رکھنے والے 83 ملزمین کے نام شامل ہیں۔ چارج شیٹ پر نظر ڈالتے ہوئے ساکیت کورٹ نے تمام ملزمین کو سمن جاری کیا ہے۔ عدالت نے تمام ملزمین کو 12 جون کو عدالت میں پیش ہونے کی ہدایت کی ہے۔
یہ چارج شیٹ 15 ہزار 449 صفحات کی ہے۔ چارج شیٹ میں تمام ملزمین پر فارن ایکٹ اور ویزا قانون کی خلاف ورزی کا الزام عائد کیا گیا ہے۔ غیر ملکی شہری جن کے خلاف چارج شیٹ دائر کی گئی ہے۔ ان میں سعودی عرب سے دس، چین سے سات، یوکرین سے تین، سوڈان سے چھ، فلپائن سے چھ، برازیل سے آٹھ، افغانستان سے چار، آسٹریلیا سے دو شامل ہیں۔ اس کے علاوہ روس، فرانس، مصر اور اردن کے ایک شہری پر چارج شیٹ میں الزام لگایا گیا ہے۔
کرائم برانچ نے 41 غیر ملکی شہریوں کو نوٹس دے کر ان سے پوچھ گچھ کی تھی۔ نظام الدین مرکز کا پتہ تمام ملزمین کے ویزا فارم میں دیا گیا ہے۔ کرائم برانچ کے مطابق 2041 غیر ملکی نظام الدین کے مرکز میں 67 ممالک سے آئے تھے۔ ان میں سے 553 انڈونیشیا سے، بنگلہ دیش سے 497، تھائی لینڈ سے 151، کرغزستان سے 145 اور ملیشیا سے 118 ہیں۔ اس کے علاوہ دیگر 62 ممالک کے 577 افراد شامل ہیں۔ اس معاملے میں کرائم برانچ نے دو مرتبہ مرکز کے صدر مولانا سعد کے گھر اور شاملی کے فارم ہاؤس پر چھاپے ماری کی تھی۔
بتا دیں کہ گذشتہ مارچ میں نظام الدین کے مرکز میں منعقدہ اس پروگرام میں تبلیغی جماعت کے لوگ بڑی تعداد میں جمع تھے۔ اس کے بعد انتظامیہ نے تبلیغی جماعت کے افراد کو باہر نکال کر قرنطینہ مرکز بھیج دیا تھا۔
