بلاس پور: صدر جمہوریہ دروپدی مرمو چھتیس گڑھ کے دو روزہ دورے پر 31 اگست کو رائے پور اور بلاس پور کے دورہ پر آئیں گی۔ صدر بننے کے بعد محترمہ مرمو کا یہ پہلا چھتیس گڑھ کا دورہ ہوگا۔ ان کے دورے کے پروگراموں کو حتمی شکل دے دی گئی ہے۔
موصولہ اطلاع کے مطابق صدر مرمو جمعرات کو صبح 11.05 بجے رائے پور کے سوامی وویکانند ہوائی اڈے پر پہنچیں گی، جہاں انہیں گارڈ آف آنر دیا جائے گا۔ یہاں سے وہ شنکر نگر میں گایتری مندر جائیں گی اور پوجا کرنے کے بعد بالودا بازار کے شانتی سروور کے لیے روانہ ہوں گی۔ یہاں پرجاپتی برہما کماری سنستھان کی طرف سے منعقدہ پروگرام میں شرکت کے بعد مہنت گھاسیداس میوزیم جائیں گی، اس کے بعد وہ سیدھے راج بھون جائیں گی اور رات میں یہاں آرام کریں گی۔
مزید پڑھیں: صدر جمہوریہ نے ثقافتی فیسٹیول اتکرش انمیش کا افتتاح کیا
صدر مرمو دوسرے دن جمعہ، یکم ستمبر کو صبح 9 بجے ہیلی کاپٹر کے ذریعے بلاسپور کے لیے روانہ ہوں گی، جہاں وہ رتن پور کے مہامایا مندر کا دورہ کریں گی۔ اس کے بعد وہ صبح 11.00 بجے گرو گھاسی داس سنٹرل یونیورسٹی کے 10ویں کانووکیشن کی تقریب میں شرکت کریں گی۔ صدر کے کانووکیشن کے بعد وہ رائے پور پہنچ کر دہلی واپس جائیں گی۔
یو این آئی