گیا: ضلع گیا میں واقع اردو گرلز پلس ٹو ہائی اسکول میں قومی یوم تعلیم کے موقع پر ایک تقریب منعقد ہوئی ، جس میں محکمہ تعلیم کی پروگرام افسر اننیا کماری نے شرکت کیا اور اس دوران اُنہوں نے طالبات سے کئی اہم سوالات یوم تعلیم، ملک کے پہلے وزیر تعلیم مولانا ابو الکلام آزاد کی خدمات اور اُنکے ویژن کے حوالے سے پوچھے جس کاجواب طالبات نے بڑے اچھے انداز میں دیا۔ طالبات کے جواب سنکر پروگرام آفیسر نے اطمینان کا اظہار کیا اور کہا کہ یہاں پروگرام میں شرکت کے دوران کئی نئی چیزوں کا انہیں علم ہوا ہے۔ اُردو گرلز ہائی اسکول لڑکیوں کو تعلیم کے زیور سے آراستہ کرانے میں نمایاں کردار پیش کر رہا ہے۔
اُنہوں نے اسکول کے تعلیمی نظام کو بھی خوب سراہا ، پرنسپل مجاہدہ حق نے بتایا کہ اُردو گرلز ہائی اسکول معروف گنج گیا کے احاطے میں قومی یوم تعلیم نہایت تزک و احتشام ساتھ منایا گیا ہے ، خراج عقیدت پیش کرنے کے ساتھ اسکول کی طالبات کے درمیان مولانا ابوالکلام آزاد کی حیات و خدمات کے عنوان پر بحث و مباحثہ کا بھی سیشن ہوا جس میں طالبات نے نمایاں طریقے سے اپنی صلاحیتوں کا مظاہرہ کیا۔ اُنہوں نے بتایاکہ چونکہ یہ پروگرام انعامی مسابقہ تھا اس وجہ سے طالبات کے حوصلے مزید بلند تھے اور طالبات نے بڑھ چڑھ کر حصہ لیا۔
یہ بھی پڑھیں: World Urdu Day Celebration مگدھ یونیورسٹی میں سہ روزہ جشن اردو کا اہتمام
اس پروگرام میں بشری خان کو اول ،عفت ناز اور فضا پروین دوئم ،دیبا معراج اور نصرت جہاں کو سوئم مقام حاصل ہوا ۔ اس موقع پر اسکول کی پرنسپل مجاہدہ حق کے علاوہ سینیئر ٹیچر محمد ہارون رشید ، ٹیچر کشور فرزانہ ، مرغوب الحسن، رومانہ پروین، نہا کماری ، ریاست نواز خان ،شاکر خان وغیرہ موجود تھے۔
