چارہ گھوٹالہ معاملے میں سزایافتہ لالو پرساد یادو کو جھارکھنڈ ہائی کورٹ سے ضمانت مل گئی ہے۔
اطلاعات کے مطابق دمکا خزانے سے غیر قانونی نکاسی کیس میں ہفتے کے روز جھارکھنڈ ہائی کورٹ میں سماعت ہوئی، جس کے بعد ہائی کورٹ نے لالو پرساد یادو کو ضمانت دے دی ہے۔
جسٹس اپریش کمار سنگھ کی عدالت نے تمام فریقین کی سماعت کے بعد مسٹر یادو کی حراست کی مدت کو کافی سمجھتے ہوئے انہیں ضمانت دے دی۔ اس معاملے میں ضمانت کی منظوری کے بعد اب مسٹر یادو کی رہائی کا راستہ صاف ہوتا دکھائی دے رہا ہے۔
واضح رہے کہ لالو یادو کو چائی باسا کے دو معاملے اور دیوگھر کے ایک معاملے میں پہلے ہی ضمانت مل چکی ہے جبکہ دمکا کیس میں آج ہائی کورٹ سے ضمانت ملنے کے بعد لالو یادو کا جیل سے باہر آنے کا راستہ صاف ہوگیا ہے۔
آر جے ڈی کے سربراہ لالو یادو نے اس معاملے میں نصف سزا مکمل کرلی تھی لیکن ضمانت کے لئے انہیں کئی بار عدالت میں عرضی داخل کرنی پڑی۔
واضح رہے کہ مسٹر یادو کو چارہ گھپلے سے متعلق چائی باسا خزانے سے متعلق دو معاملوں اور دیو گھر کے ایک معاملے میں پہلے سے ہی ضمانت مل چکی ہے۔ دمکا خزانے سے نکاسی کے متعلق معاملے میں ضمانت ملنے کے بعد اب ان کے جیل سے باہر نکلنے کا راستہ ہموار ہوگیا ہے۔
مسٹر یادو کا فی الحال آل انڈیا انسٹی ٹیوٹ آف میڈیکل سائنسز (ایمس) دلی میں علاج چل رہا ہے۔ عدالت کے فیصلے کی کاپی ملتے ہی جیل سپرنٹنڈنٹ کو مہیا کرادی گئی۔ جیل سپرنٹنڈنٹ کی جانب سے دلی میں حکم کی کاپی بھیج کر مسٹر یادو کو عدالت حراست سے رہا کرنے کے حکم سے واقف کرایا جائے گا۔ اس عمل میں ایک دو دن کا وقت لگ سکتا ہے۔
اس سے قبل 9 اپریل 2021 کو آر جے ڈی کے سربراہ مسٹر یادو کی درخواست ضمانت اسی عدالت میں سماعت ہوئی تھی۔ سماعت کے دوران ملک کے سینئر ایڈووکیٹ کپل سبل نے مسٹر یادو کی ضمانت کے لئے عدالت کے روبرو استدعا کی۔ اسی وقت ، سینٹرل بیورو آف انویسٹی گیشن (سی بی آئی) کے وکیل نے عدالت سے جوابی حلف نامہ داخل کرنے کے لئے تین دن کا وقت مانگا تھا۔ عدالت نے تفتیشی ایجنسی کی درخواست قبول کرتے ہوئے انہیں تین دن کا وقت دیتے ہوئے حلف نامہ داخل کرنے کی ہدایت کی۔
دمکا خزانے سے متعلق کیس میں بہار کے سابق وزیر اعلی نے اپنے ایڈووکیٹ دیورشی منڈل کے توسط سے ہائی کورٹ میں ضمانت کی درخواست دائر کی تھی۔
وہیں 19 فروری 2021 کو ہائی کورٹ نے آر جے ڈی سپریمو کی ضمانت مسترد کرتے ہوئے کہا کہ انہوں نے دمکا خزانے کیس میں نصف سزا پوری نہیں کی ہے۔ مسٹر یادو کی درخواست ضمانت کے لئے پیش ہوئے ایڈووکیٹ دیورشی منڈل نے کہا کہ 9 اپریل کو لالو یادو کی آدھی سزا پوری ہو رہی ہے۔ لہذا ، ضمانت کی درخواست کی سماعت اسی دن ہو۔
