شہر گیا کے معروف گنج میں جمعہ کی نماز پڑھ کر گھر واپس جا رہے بہار کانگریس کے ترجمان اعظمی باری کے بھائی فہیم باری کو نقاب پوش بدمعاشوں نے گولی مار دی۔
فہیم باری کو تین گولیاں ماری گئی ہیں جبکہ ان کے گھر میں کرایہ میں رہنے والا منٹو کو ایک گولی لگی ہے۔
دونوں کی حالت تشویشناک بتائی جا رہی ہے۔ یہ واقعہ شہر کے معروف گنج نالا روڈ پر پیش آیا ہے۔ گولی مارنے والے چہرے کو چھپائے ہوئے تھے۔
بتایا جا رہا ہے کہ پہلے سے ہی بدمعاش نشانہ لگا کربیٹھے تھے جیسے ہی اعظمی باری نماز پڑھ کر اپنے گھر جانے لگے اسی دوران مسجد سے کچھ دوری پر نالا روڈ پر انہیں گولی ماری گئی۔
اس واردات کی اطلاع ملتے ہی پولیس کے اعلیٰ افسران نے موقع پر پہنچ کر جائزہ لیا۔ سٹی ڈی ایس پی راج کمار شاہ انوگرہ نارائن ہسپتال پہنچے۔ فہیم باری ہوش میں ہیں اور انہوں نے بیان دیتے ہوئے کہا کہ پپو یادو، سنجے یادو، انیرودھ یادو نے ان پر گولیاں چلائی ہیں۔
گولی چلانے کی واردات پاس کے دکان اور مکان میں لگے سی سی ٹی وی کیمرے میں قید ہو گئی۔ فہیم باری کے بیان کے مطابق گیا کے رانی گنج میں ان کی خاندانی زمین کا تنازع ایک فریق سے چل رہا ہے۔ سنہ 2018 میں بھی فہیم باری پر جان لیوا حملہ ہوا تھا۔
سٹی ڈی ایس پی راج کمار شاہ نے کہا کہ سی سی ٹی وی کے فوٹیج لیے گئے ہیں۔ بدمعاشوں کی پہچان کر لی گئی ہے۔ ان کی گرفتاری کے لیے چھاپے ماری کی جارہی ہے۔ بدمعاش جلد ہی پولیس کی گرفت میں ہوں گے۔
انہوں نے بتایا کہ فہیم باری کو گولی اس وقت ماری گئی ہے جب وہ نماز پڑھ کر گھر واپس جا رہے تھے، دو افراد کو گولی لگی ہے۔
