بانڈی پورہ: گریز میں موبائل ٹاور کا افتتاح، 4جی خدمات کا آغاز

ضلع بانڈی پورہ کے سرحدی قصبہ گریز میں کنزلون ایک ایسا علاقہ ہے جہاں پر موبائل نیٹورک کے حوالے سے لوگوں کو کافی دقتوں کا سامنا کرنا پڑتا تھا اور یہاں کے لوگ 4 جی انٹرنیٹ سروس سے بھی محروم تھے۔

موبائل نیٹ ورک کمپنی ریلائنس جیو کی جانب سے علاقے میں باضابطہ طور موبائل ٹاور کا افتتاح کیا گیا جس سے اب علاقے میں لوگ 4 جی انٹرنیٹ سروس سے استفادہ حاصل کر سکتے ہیں خصوصاً طلباء کے بہتر مستقبل کے لئے یہ ایک سنگ میل کی حیثیت رکھتا ہے۔

افتتاحی تقریب کے دوران بلاک ڈیولپمنٹ چیئرمین مختار احمد نے جیو کمپنی کا شکریہ ادا کرتے ہوئے کہا کہ ’’کنزلون علاقے میں خوشی کی لہر دوڑ گئی ہیں کیونکہ گریز کے اس علاقے میں اس سے قبل لوگوں کو کمیونیکیشن کے حوالے سے کافی مسائل درپیش تھے۔‘‘

بی ڈی سی کنزلون نے مزید کہا کہ علاقے میں موبائل ٹاور نصب ہونا اور 4جی سروسز شروع ہونا ان کے لئے بہت اہم ہیں کیونکہ ’’ان دنوں جبکہ کورونا وائرس کے دوران تعلیمی ادارے بند ہیں اور طلباء آن لائن کلاسز کے ذریعے تعلیم حاصل کر رہے ہیں۔ علاقے میں فور جی سروسز نہ ہونے سے طلبہ آن لائن طرز سے پڑھائی نہیں کر پا رہے تھے۔‘‘

قابل ذکر ہے کہ سرحدی علاقہ گریز کا قریب 5 ماہ تک ضلع سمیت وادی کشمیر سے زمینی رابطہ منقطع رہتا ہے اور علاقے میں کمزور موبائل نیٹ ورک کے سبب لوگوں کو کافی دقتوں کا سامنا کرنا پڑتا تھا۔