اننت ناگ (جموں کشمیر) : ’’وکست بھارت سنکلپ یاترا‘‘ کا مقصد صفائی ستھرائی، اقتصادی خدمات، بجلی، مکانات کے بارے میں بیداری پیدا کرنا اور فلاح وبہبود سے متعلق اسکیموں کے فائدے کو ہر ایک شہری تک پہنچانا ہے۔ اسی ضمن میں جاری پروگرامز کے تحت ضلع ترقیاتی کمشنر اننت ناگ، سعید فخرالدین حامد، ضلع نے دیگر افسران کی موجودگی میں اننت ناگ کے کھنہ بل علاقے میں وکست بھارت سنکلپ یاترا کو ہری جھنڈی دکھائی۔ ملک بھر میں منعقد کی جانے والی اس یاترا کا مقصد آئی ای سی کی سرگرمیوں کے علاوہ کمیونٹی ویلفیئر کو بااختیار بنانے کی کوششوں کو تیز کرنا ہے۔ کھنہ بل، اننت ناگ میں منعقدہ اس پروگرام کے دوران ایک رنگا رنگ تقریب کا بھی انعقاد کیا گیا جس میں مختلف اسکولی بچوں نے کلچرل پروگرام پیش کرکے حاضرین کو محظوظ کیا۔ اس دوران مختلف محکموں نے اسٹال بھی لگائے تھے۔
افتتاحی تقریب کھنہ بل ہائر سیکنڈری اسکول میں منعقد ہوئی جس میں لوگوں کی ایک بڑی تعداد نے شرکت کی۔ اس موقع پر ضلع ترقیاتی کمشنر سعید فخرالدین حامد نے تعلیم، ٹیکنالوجی اور اقتصادی ترقی، سماجی ہم آہنگی سمیت ترقی کے مختلف پہلوؤں پر روشنی ڈالی۔ انہوں نے کہا کہ ’’یہ تقریب ترقی پسند بھارت کی عکاسی کرتی ہے۔‘‘ تقریب کے دوران ڈی سی نے کہا کہ ’’وکست بھارت سنکلپ یاترا ایک تبدیلی کا سفر بننے کے لیے تیار ہے، جو ضلع اننت ناگ کے روشن مستقبل کی بنیاد رکھے گی۔‘‘ ڈی سی نے عام لوگوں پر زور دیا کہ وہ یاترا میں بڑھ چڑھ کر حصہ لیں۔ انہوں نے ترقیاتی منصوبوں کے نفاذ کے لیے حکومت اور کمیونٹی کے درمیان تعاون کی ضرورت پر زور دیا۔ انہوں نے کہا کہ ضلع انتظامیہ پائیدار ترقی کے حصول اور ضلع کے مجموعی سماجی و اقتصادی تانے بانے کو بلند کرنے کے لیے لوگوں کے ساتھ ہاتھ ملا کر کام کرنے کے لیے پرعزم ہے۔
مزید پڑھیں: پلوامہ کے بی جے پی ارکان نے بھی وکست بھارت سنکلپ یاترا میں حصہ لیا
ڈی سی نے وکست بھارت سنکلپ یاترا کا پیغام لے جانے والی گاڑی کو جھنڈی دکھا کر روانہ کیا اور محکموں کو ہدایات دی گئی کہ وہ مرکزی اور یو ٹی دونوں کی اسپانسر شدہ سماجی، اقتصادی اور فلاحی اسکیموں کے بارے میں بیداری کریں۔ یاد رہے کہ وِکست بھارت سنکلپ یاترا بھی عوام تک بھارت سرکار کی رسائی کی اب تک کی سب سے بڑی پہل ہے۔
