جنوبی کشمیر میں ڈرگ مافیا کے خلاف پولیس کا کریک ڈاؤن جاری ہے۔ اننت ناگ پولیس اور محکمۂ مال نے ایک مخصوص اطلاع پر واگہامہ، بجبہاڑہ سے تعلق رکھنے والے محمد یوسف ریشی کے گھر پر چھاپہ مارا۔
پولیس کے مطابق ایس ڈی پی او بجبہاڑہ، ایس ایچ او بجبہاڑہ سمیت متعلقہ ایگزیکٹیو مجسٹریٹ پر مشتمل ایک ٹیم نے تلاشی کارروائی کے دوران محمد یوسف ریشی کے صحن میں زیر زمین بنائے گئے ایک خفیہ ٹھکانے کا پتہ لگاکر پوست کے 27 تھیلے برآمد کیے۔
پولیس کے مطابق چھاپے کے دوران قریب 580 کلو گرام پوست کو ضبط کر لیا گیا، تاہم مالک مکان موقع سے فرار ہونے میں کامیاب ہوگئے، جب کہ محمد یوسف کے دو فرزندان - زاہد احمد ریشی اور عامر احمد ریشی- کو گرفتار کرلیا گیا۔
اس حوالے سے این ڈی پی ایس ایکٹ کی متعلقہ دفعات کے تحت ایف آئی آر نمبر 226/2021 پولیس اسٹیشن بجبہاڑہ میں درج کرکے مزید تحقیقات شروع کردی گئی ہیں۔
مزید پڑھیں؛ بجبہاڑہ میں پانی کی شدید قلت، لوگوں کو مشکلات کا سامنا
واضح رہے کہ حالیہ دنوں ضلع اننت ناگ میں پولیس نے کئی منشیات فروشوں کو گرفتار کرکے بھاری مقدار میں منشیات کو ضبط کرلیا ہے۔ اننت ناگ پولیس نے منشیات کا قلع قمع کرنے کے لیے عوام سے بھی تعاون کی اپیل کی۔
