کولکاتا: بھارتی کرکٹ ٹیم کے سابق جارح سلامی بلے باز وریندر سہواگ نے انڈین پریمیئر لیگ (آئی پی ایل) میں اچھی کارکردگی کا مظاہرہ کرنے والے ممبئی کے یشسوی جیسوال کو مستقبل کا اسٹار بلے باز قرار دیتے ہوئے کہا کہ وہ وراٹ کوہلی کے نقش قدم پر چلتے ہوئے نصف سنچری کو سنچری اننگز میں بدلنے کا فن جانتے ہیں۔ اسٹار اسپورٹس کے کرکٹ لائیو پر بات کرتے ہوئے سہواگ نے کہاکہ یشسوی جیسوال مستقبل کے ستارے ہیں۔ انہوں نے وراٹ کوہلی سے 50 کو 100 میں تبدیل کرنے کا فن سیکھا ہے۔ بہت سے بلے باز 13 گیندوں پر 50 رنز بنانے کے بعد اپنی وکٹیں پھینکتے ہیں، لیکن یشسوی آگے بڑھنا چاہتے ہیں۔ اس میں بڑی اننگز کھیلنے کی ہمت ہے۔
یہ بھی پڑھیں:IPL 2023 حیدرآباد کو شکست دے کر بنگلور پلے آف کی دوڑ میں برقرار
واضح رہے کہ آئی پی ایل کے موجودہ سیزن میں راجستھان رائلز کے لیے کھیلتے ہوئے یشسوی نے اب تک 13 میچوں میں 47.92 کی اوسط اور 166.18 کے اسٹرائیک ریٹ سے 575 رنز بنائے ہیں۔ اس سیزن میں انہوں نے ایک سنچری اور چار نصف سنچریاں اسکور کی ہیں۔ ہندوستان کے سابق اسپنر ہربھجن سنگھ اور کئی دوسرے تجربہ کار کھلاڑی بھی یشسوی کی صلاحیتوں کے قائل رہے ہیں۔ ہربھجن نے اس سے قبل ایک انٹرویو میں کہا تھا کہ ہندوستان کو ابھی سے ٹی ٹوئنٹی میں نوجوانوں کو ترجیح دینا شروع کر دینی چاہیے اور یشسوی اور رنکو سنگھ جیسے کھلاڑیوں کو اس میں جگہ دینا چاہیے۔دونوں کھلاڑیوں کی کارکردگی میں نمایاں بہتری آئی ہے۔
یواین آئی
