بھارت کی دویا كاكران نے سینئر ایشین کشتی چمپئن شپ کے تیسرے دن یہاں اندرا گاندھی اسٹیڈیم کے کے ڈی جادھو کشتی ہال میں جمعرات کو شاندار کارکردگی کا مظاہرہ کرتے ہوئے 68 کلوگرام کلاس میں طلائی تمغہ جیت لیا۔
دویا نے اس طرح ہندستان کو مقابلہ میں دوسرا طلائی اور کل چھٹا تمغہ دلا دیا۔
دویا کے وزن کلاس میں کل پانچ پہلوان ہونے کی وجہ سے راؤنڈ رابن نظام کا سہارا لیا گیا جس میں ہر پہلوان کو دوسرے پہلوان سے نبرد آزما ہو نا ہے۔ دویا نے اپنے چار مقابلے جیتے اور طلائی تمغہ کی حقدار بنی۔
دویا نے 68 کلوگرام وزن کے زمرے میں جاپانی کھلاڑی نارها متسيكي کو 6-4 سے شکست دیتے ہوئے طلائی اپنے نام کر لیا۔
بھارتی خاتون کشتی کی تاریخ کو دیکھا جائے تو ایشین چمپئن شپ کے خواتین کے زمرے میں بھارت کا یہ دوسرا طلائی تمغہ ہے۔
اس سے پہلے بھارت کی نوجوت کور نے سینئر ایشین چمپئن شپ 2018 کرغزستان میں طلائی تمغہ جیتنے والی پہلی بھارتی خاتون پہلوان بنی تھیں۔
دویا نے اپنے پہلے راؤنڈ میں قازقستان کی البنا كیرگیلڈنووا کو 6-0، دوسرے راؤنڈ میں منگولیا کی پہلوان دیلگیرما اینخسايخان کو 11-2، تیسرے راؤنڈ میں ازبکستان کی اجودا ایسبیجینووا کو 8-0 اور چوتھے راؤنڈ میں جاپان کی نارها متسيكي کو 6- 4 سے شکست دیتے ہوئے طلائی تمغہ پر قبضہ کیا۔
