آستانہ: بھارتی پہلوان نشا دہیا نے منگل کو ایشیائی چمپئن شپ کے فائنل میں جاپان کی آمی ایشی سے ہار کر چاندی کے تمغے پر اکتفا کیا۔ عالمی چیمپئن شپ کی سلور میڈلسٹ ایشی نے 68 کلوگرام زمرے کے فائنل میں بھارتی پہلوان کو 10-0 سے شکست دی۔ اس سے پہلے نشا نے چین کی فینگ زو کے خلاف پیچھے رہنے کے بعد واپسی کرتے ہوئے گولڈ میڈل کے مقابلے میں جگہ بنائی تھی۔ ایشیائی چیمپئن شپ میں ڈیبیو کرنے والی نشا سیمی فائنل میں ایک مرحلے پر 3-6 سے پیچھے تھیں لیکن انہوں نے واپسی کرتے ہوئے فینگ کو 7-6 سے ہرایا۔ اس سے قبل انہوں نے کوارٹر فائنل میں منگولیا کی ڈیلگرما اینکھسائیخان کو شکست دی تھی۔ دریں اثنا، نشا کی ہم وطن پریا (76 کلوگرام) نے کانسے کے تمغے کے مقابلے میں جاپان کی میزوکی ناگاشیما کو 2-1 سے شکست دی۔
نیشا دہیا اور پریا کے تمغوں سے ایشیائی ریسلنگ چیمپئن شپ 2023 میں ہندوستان کے تمغوں کی تعداد 6 ہو گئی ہے۔ پچھلے دنوں گریکو رومن پہلوان روپن (55kg) نے چاندی کا تمغہ جیتا تھا جب کہ نیرج (63kg)، وکاس (72kg) اور سنیل کمار (87kg) نے کانسے کا تمغہ جیتا تھا۔ نیلم نے بھی 50 کلوگرام کے کانسے کے تمغے کے مقابلے میں جگہ بنائی تھی، لیکن انہیں جاپان کی ریمینا یوشیموتو کے ہاتھوں 8-0 سے شکست کا سامنا کرنا پڑا۔ اس سے قبل نیلم نے کوارٹر فائنل میں قازقستان کی ایلڈا ماخیدینووا کے خلاف پن فال کے ذریعے کامیابی حاصل کی۔ واضح رہے کہ بھارتی خواتین پہلوانوں نے پچھلے سال منگولیا کے اولانبٹار میں ایشین چمپئن شپ میں دو چاندی اور تین کانسے کے تمغے جیتے تھے۔
یہ بھی پڑھیں: Under 23 World Wrestling Championship ساجن نے انڈر-23 ورلڈ چیمپئن شپ میں تاریخی تمغہ جیتا
یو این آئی
