وزارت کھیل کی 12 رکنی ایوارڈ کمیٹی نے ارجن ایوارڈ کے لیے 29 کھلاڑیوں کے ناموں کی سفارش کی ہے جس پر حتمی فیصلہ مرکزی وزیر کھیل کرن رجیجو کریں گے۔
عام طور پر ارجن ایوارڈ 15 سے 20 کھلاڑیوں کو دیا جاتا ہے لیکن کمیٹی نے 29 کھلاڑیوں کے ناموں کی بڑی فہرست وزارت کھیل کو بھیجی ہے۔
ان کھلاڑیوں میں استانو داس(تیر انداز)، ہاکی کھلاڑی دپیکا ٹھاکر اور ٹینس کھلاڑی دیوج شرن شامل ہیں۔
یہ بھی دلچسپ امر ہے کہ کمیٹی نے ارجن ایوارڈ کے لیے ایسے دو کھلاڑیوں کا انتخاب کیا ہے جنہیں پہلے ہی ملک کا سب سے بڑا کھیل اعزاز راجیو گاندھی کھیل رتن دیا جاچکا ہے۔
سنہ 2016 میں ریو اولمپکس میں کانسے کا تمغہ جیتنے کے بعد ساکشی ملک کو کھیل رتن سے نوازا گیا تھا جبکہ عالمی چیمپیئن ویٹ لفٹر میرابائی چانو کو قومی کرکٹ ٹیم کے کپتان وراٹ کوہلی کے ساتھ 2018 میں کھیل رتن سے بھی نوازا گیا تھا۔
اب وزیر کھیل کو دیکھنا پڑے گا کہ کیا کھیل رتن سے نوازے گئے کھلاڑیوں کو ارجن ایوارڈ دیا جا سکتا ہے؟
