ہریانہ سے تعلق رکھنے والی خاتون اسٹرائیکر نوجوت گذشتہ برسوں میں بھارتی ٹیم میں کلیدی کھلاڑی رہی ہیں۔ انہوں نے کہا کہ وہ بھارتی خواتین کی ہاکی ٹیم کی فنشر بننے کی متمنی ہیں۔ نوجوت اب تک 172 بین الاقوامی میچ کھیل چکی ہیں۔
25 سالہ اسٹرائیکر نے کہا کہ کسی بھی ہاکی ٹیم کے لیے فنشر کا کردار اہم ہوتا ہے۔ مجھے خوشی ہے کہ مجھے اپنے ساتھیوں کے ذریعہ پیدا کردہ مواقع سے فائدہ اٹھانے کا موقع ملا ہے۔ اگرچہ اس کام میں بہت دباؤ ہے لیکن میں ان چیلنجوں سے لطف اندوز ہوں۔
نوجوت نے کہا کہ میں فنش کرنے کی تکنیک پر کام کرنا چاہتی ہوں۔ امید ہے کہ میں ایک دن دنیا کی سب سے اچھی فننشر بنوں گی۔
انہوں نے کہا کہ 2014 اور 2018 ایشین گیمز میں کانسی کا تمغہ اور چاندی کا تمغہ جیتنے والی ٹیم کا حصہ بننا میرے کیریئر کا بہترین لمحہ رہا ہے۔ تاہم 2019 ہمارے لیے سب سے اہم سال رہا ہے۔ ایف آئی ایچ ویمنز سیریز فائنلز میں فاتح ٹیم کا حصہ بننا خوشگوار تجربہ تھا۔ اس کے بعد ہم نے اولمپک کوالیفائر میں امریکہ کو شکست دے کر اولمپکس میں جگہ بنائی۔ گذشتہ سال ہماری ٹیم کے لئے بہت اچھا رہا اور مجھے امید ہے کہ آنے والے سالوں میں بھی ہم بڑے ٹورنامنٹ جیتیں گے۔
نوجوت نے کہا کہ میں آج اپنے والدین ، خاص طور پر میرے والد کے تعاون کے بغیر اس جگہ تک نہیں پہنچ سکتی تھی، جنہوں نے مجھے اسکول کے وقت سے ہی ہاکی کھیلنے کی ترغیب دی ہے۔ ان کا ہمیشہ سے ایک کھلاڑی بنانے کا خواب تھا اور میں خوش ہوں کہ میں ان کا خواب پورا کر سکتی ہوں۔ مجھے امید ہے کہ میں مستقبل میں بھی اپنے کھیل میں بہتری کروں گی اور اپنے والدین کو کھیلوں کی کامیابیوں پر فخر کا موقع دوں گی۔
