ممبئی:ویسٹ انڈیز کا دورہ 2023-25 ورلڈ ٹیسٹ چیمپئن شپ (ڈبلیو ٹی سی ) سائیکل میں ان کی پہلی سیریز ہو گی لیکن سلیکٹرز آسٹریلیا کے ہاتھوں ڈبلیو ٹی سی فائنل میں شکست کے بعد ٹیم میں کوئی بڑی تبدیلی نہیں کر رہے ہیں۔ روہت شرما، شبھمن گل، وراٹ کوہلی اور اجنکیا رہانے ڈومینیکا اور ٹرینیڈاڈ میں ہونے والے دو ٹیسٹ میچوں میں شرکت کے لیے تیار ہیں، لیکن ٹیم میں چیتشور پجارا کی جگہ پر سوالیہ نشان ہے۔
پجارا، جنہوں نے ٹیسٹ کرکٹ میں طویل عرصے سے ہندوستان کے لیے تیسرے نمبر پر بیٹنگ کی ہے، 2020 سے اب تک 52 اننگز (28 ٹیسٹ) میں 29.69 کی مایوس کن اوسط سے صرف ایک سنچری اسکور کر پائے ہیں۔ دسمبر 2022 میں چٹاگانگ ٹیسٹ میں 90 اور 102 ناٹ آؤٹ کے اسکور کو ہٹانے سے، ان کی بیٹنگ اوسط 26.31 ہوجاتی ہے۔ رپورٹ کے مطابق پجارا کا ٹیسٹ ٹیم سے باہر ہونا یقینی نہیں ہے لیکن یہ کہا جا سکتا ہے کہ الیون میں ان کی جگہ پائیدار نہیں رہی۔ اگر انہیں ویسٹ انڈیز کے دورے کے لیے بھی منتخب کیا جاتا ہے تو ان کے کھیلنے کا یقین نہیں ہے۔ کرک بز کے مطابق، ہندوستانی ٹیم انتظامیہ اس جگہ کے لیے جیسوال کو آزما سکتی ہے۔
رپورٹ میں کہا گیا ہے کہ بی سی سی آئی ٹیم کی ساخت کو ایک ہی جھٹکے میں تبدیل کرنے کا تجربہ نہیں کرنا چاہتا اور روہت شرما کھیل کے طویل ترین فارمیٹ میں ہندوستان کی کپتانی جاری رکھیں گے۔ کرک بز نے بی سی سی آئی کے ایک ذرائع کے حوالے سے کہا، "ہر ٹیسٹ اہم ہوتا ہے، اور اس کا نتیجہ ورلڈ ٹیسٹ چیمپئن شپ کے پوائنٹس ٹیبل میں تعاون دیتا ہے۔ ہم ٹیسٹ میچ میں تجربہ نہیں کر سکتے۔"
ٹیم میں پجارا کی جگہ کے علاوہ سلیکٹر محمد شامی کو بھی آرام دینے پر غور کر سکتے ہیں۔ شامی بارڈر گواسکر ٹرافی کے بعد سے مسلسل گیند بازی کر رہے ہیں۔ انہوں نے ڈبلیو ٹی سی فائنل سے قبل 17 آئی پی ایل میچ بھی کھیلے۔ اکتوبر-نومبر میں ہندوستانی سرزمین پر منعقد ہونے والے ون ڈے ورلڈ کپ کو ذہن میں رکھتے ہوئے، شامی کو ویسٹ انڈیز ٹیسٹ سیریز کے لیے آرام دیا جا سکتا ہے۔
یہ بھی پڑھیں:ICC Test Ranking رہانے شاردول کو ٹیسٹ رینکنگ میں برتری مل گئی، جانیں کون ہے ٹاپ تھری میں؟
آندھرا پردیش کے وکٹ کیپر سریکر بھرت کے ڈبلیو ٹی سی فائنل میں بلے سے ناقص کارکردگی کے باوجود ٹیسٹ ٹیم میں اپنی جگہ برقرار رکھنے کا امکان ہے۔ شریس ایر اور کے ایل راہل کی غیر موجودگی میں، سنجو سیمسن ون ڈے اور ٹی ٹوئنٹی اسکواڈ میں واپسی کرسکتے ہیں۔
یواین آئی
