جنوبی افریقہ کے خلاف ہوم گراؤنڈ میں پانچ یک روزہ میچوں کی سیریز 3-1 سے ہارچکی میزبان ٹیم بھارت بدھ کو سیریز کے آخری مقابلے میں ساکھ بچانے کے لئے جیت درج کرنے کے ارادے سے میدان میں اترے گی۔
اٹل بہاری واجپئی اکانہ انٹرنیشنل کرکٹ اسٹیڈیم کی پچ سے اچھی طرح واقف ہوچکی دونوں ٹیموں کے درمیان سیریز کا آخری ون ڈے دلچسپ ہوسکتا ہے۔ اس میچ کے ذریعے جنوبی افریقہ جہاں اگلے سال ہونے والے ورلڈ کپ کے لئے میزبان ٹیم کے خلاف نفسیاتی برتری حاصل کرنے کی کوشش کرے گی، وہیں بھارتی لڑکیاں میچ کو اپنے حق میں کرکے آئندہ ٹی-20 سیریز کے لئے خود کو تیارکرنے کی کوشش کریں گی۔
کورونا انفیکشن کی وجہ سے ہندوستانی ٹیم گزشتہ ایک سال سے کرکٹ کے میدان سے دور رہی تھی جبکہ جنوبی افریقہ کی لڑکیوں نے پاکستان کو شکست دے کر ہندوستانی سرزمین پر قدم رکھا تھا۔ اگلے سال نیوزی لینڈ میں کھیلے جانے والے ورلڈ کپ سے قبل دونوں ٹیموں کے درمیان یہ سیریز کافی اہم مانی جارہی تھی۔ جنوبی افریقہ نے پانچ میچوں کی سیریز کا آغاز جیت کے ساتھ کیا۔ وہیں ہندوستان نے دوسرا ون ڈے جیت کر سیریز برابر کی تھی ۔ حالانکہ تیسرا اور چوتھا ون ڈے جیت کر مہمانوں نے سیریز میں فیصلہ کن برتری حاصل کرلی ہے۔
میچ میں تجربہ کار میڈیم پیسر جھولن گوسوامی کی واپسی کا قوی امکان ہے جبکہ کچھ نئے چہروں کو بھی پلیئنگ الیون میں شامل کیا جاسکتا ہے۔ اس میچ میں اسمرتی مندھانا، متھالی راج اور پونم راوت کو لمبے اسکور کے لئے میدان میں اترنا ہوگا وہیں ٹیم کے لئے بولنگ اور فیلڈنگ میں بہت زیادہ بہتری کی ضرورت ہے۔
گذشتہ چار میچوں کی طرح فائنل میچ میں بھی ٹاس کا کردار اہم سمجھا جارہا ہے۔ اب تک کھیلے گئے چار میچوں میں ٹاس جیتنے والی ٹیم نے پہلے فیلڈنگ کا فیصلہ کیا ہے اور ہدف کا پیچھا کرتے ہوئے میچ کو اپنے حق میں کیا ہے۔ دونوں کپتان اس میچ میں بھی چاہیں گے کی اس مرتبہ قسمت ان کے ساتھ ہو جس سے میچ سے قبل کم از کم ٹیم کو نفسیاتی برتری حاصل ہو۔
یو این آئی
