پاکستان کرکٹ ٹیم کے سابق کپتان شعیب ملک نے پاکستان کرکٹ بورڈ (پی سی بی) کے خلاف کھلاڑیوں کے انتخاب میں جانبداری کا الزام عائد کرتے ہوئے کہا ہے کہ کھلاڑیوں کا انتخاب کارکردگی کی بنیاد پر نہیں بلکہ تعلقات کی بنیاد پر کیا جاتا ہے۔
شعیب ملک نے ایسی تنقید اس وقت کی ہے جب پی سی بی کی سلیکشن کمیٹی نے زمبابوے میں حالیہ ختم ہونے والی ٹیسٹ سیریز کے لیے کھلاڑیوں کے انتخاب سے متعلق کپتان بابر اعظم کی تجاویز کو نظر انداز کیا۔
ملک نے ایک ویب سائٹ کو بتایا "ہماری کرکٹ میں پسند اور ناپسند کا ایک نظام موجود ہے۔ یہ ایسی چیز ہے جو باقی دنیا میں بھی موجود ہے لیکن ہماری ثقافت میں کچھ زیادہ ہی ہے۔ جس دن ہمارے کرکٹ سسٹم میں تبدیلیاں آئیں گی اور زیادہ مہارت والے کھلاڑی کو اہمیت دی جائے گی تبھی چیزیں بہتر ہونگی۔ آج صرف تعلقات پر ہی غور کیا جاتا ہے۔
ملک نے کہا کہ سلیکشن خالصتا میرٹ پر ہونا چاہئے اور کپتان اعظم کو اپنی ٹیم کا انتخاب کرنے کی پوری آزادی دی جانی چاہئے۔
ملک نے کہا کہ حالیہ ٹیم میں بہت سے ایسے کھلاڑی موجود تھے جن کو بابر منتخب کرنا چاہتے تھے لیکن ان کا انتخاب نہیں کیا گیا تھا۔ ہر ایک کی اپنی اپنی رائے ہے لیکن سلیکشن کے بارے میں حتمی فیصلہ کپتان کا ہونا چاہئے کیوں کہ وہی اپنی ٹیم کے ساتھ میدان میں اتریں گے۔
