انگلینڈ کرکٹ ٹیم کے آل راؤنڈر معین علی نے چنئی سُپر کنگز انتظامیہ سے درخواست کی تھی کی ان کی ٹی شرٹ سے الکوہل (شراب) کا لوگو ہٹایا جائے جس کے بعد ٹیم انتظامیہ نے ان کی درخواست مان لی ہے۔
انگلش کرکٹر معین علی نے گذشتہ سیزن میں رائل چیلیجرز بنگلور کی جانب سے کھیلا تھا لیکن اس بار وہ چنئی سُپر کنگز کی نمائندگی کریں گے۔ سی ایس کے فرنچائزی نے انہیں آئی پی ایل نیلامی میں سات کروڑ روپے میں خریدا ہے۔
واضح رہے کہ معین علی انگلینڈ کی قومی کرکٹ ٹیم کی جرسی پر بھی شراب کی تشہیر سے گریز کرتے ہیں جبکہ ان کے ساتھی کھلاڑی عادل رشید بھی الکوہل جیسے کسی بھی طرح کے اشتہار سے دور رہتے ہیں اس کے علاوہ جنوبی افریقہ کے سابق کرکٹر ہاشم آملہ بھی شراب کے اشتہار والی ٹی شرٹ نہیں پہنتے تھے جس کی وجہ سے ان کی میچ فیس میں بھی کٹوتی ہوتی تھی۔
انڈین پریمیئر لیگ خطاب پر تین بار قبضہ کرچکی چنئی سُپر کنگز نے معین علی پر جم کر پیسہ برسایا ہے اور سات کروڑ روپے خرچ کر کے انہیں ٹیم میں شامل کیا ہے۔
